‘तुम्ही चांदवडमधून डॉ. राहुल आहेर यांना निवडून द्या ,मी त्यांना मंत्री करतो,’ असे आश्वासन फडणवीस यांनी जाहीर सभेत दिले होते. मात्र, नाशिक जिल्ह्याने भाजपला पाच आमदार निवडून दिले असताना एकालाही मंत्रिपदाची संधी न मिळाल्याने पक्ष पदाधिकारी, तसेच कार्यकर्त्यांत नाराजीची भावना निर्माण झाली आहे. मागील सरकारमध्ये नाशिक जिल्ह्यात महायुतीचे तेरा आमदार होते. त्यात भाजपचे पाच, राष्ट्रवादीचे सहा, तर शिवसेनेच्या दोन आमदारांचा समावेश होता. त्यामुळे नाशिककरांना महायुतीच्या सरकारमध्ये दोन कॅबिनेट मंत्रिपदे मिळाली होती.

अजितदादांनी शब्द पाळला

यंदाच्या विधानसभा निवडणुकीतही नाशिक जिल्ह्याने महायुतीला साथ दिली. १५ पैकी १४ आमदार महायुतीचे निवडून आले. विधानसभेच्या प्रचाराच्या रणधुमाळीत अधिकाधिक आमदार निवडून यावेत यासाठी राष्ट्रवादी काँग्रेस, तसेच भाजपने जिल्ह्यातील आमदारांना मंत्रिपदाचे आश्वासन दिले होते. विधानसभा निवडणुकीत सिन्नरकरांनी कोकाटे यांना भरघोस मतांनी निवडून दिल्याने कोकाटे यांचे मंत्रिपद निश्चित मानले जात होते. रविवारी नागपुरात झालेल्या मंत्रिमंडळ विस्तारात अजित पवारांनी सिन्नरकरांना दिलेला शब्द खरा ठरवला आहे. कोकाटे यांची राष्ट्रवादीच्या कोट्यातून कॅबिनेट मंत्रिपदी वर्णी लागली आहे.
Cabinet Expansion : सातारा-कोल्हापूर तुपाशी, सांगली-सोलापूर उपाशी; पुन्हा ‘बाहेरचे’ पालकमंत्री मिळणार
विधानसभेत पाचव्यांदा निवडून आलेल्या कोकाटे यांचा मंत्रिमंडळात समावेश झाल्यावर सिन्नरकरांनी जल्लोष केला. दुसरीकडे भाजपमध्ये मात्र सन्नाटा पाहायला मिळत आहे.

नाशिकमधून भाजपच्या कोट्यातून मात्र कोणालाही मंत्रिपद न मिळाल्याने मुख्यमंत्री फडणवीसांनी नाशिककरांना फसवल्याची भावना आहे. सिंहस्थाच्या पार्श्वभूमीवर नाशिककरांना यंदा मंत्रिपद मिळेल, अशी अपेक्षा होती. परंतु, भाजपच्या श्रेष्ठींनी नाशिककरांची फसवणूक केल्याची भावना पदाधिकाऱ्यांमध्ये आहे.
Raju Patil : मनसेचा माजी आमदार ‘सागर’ बंगल्यावर, देवेंद्र फडणवीसांची भेट घेणार, कारण इंटरेस्टिंग

‘मुख्यमंत्री फडणवीसांकडून विश्वासघात!’

विधानसभा निवडणुकीच्या प्रचारादरम्यान चांदवड येथील सभेत ‘तुम्ही मला आमदार द्या, मी तुम्हाला नामदार देतो,’ असा शब्द देवेंद्र फडणवीस यांनी दिला होता. मात्र, रविवारी मंत्रिमंडळाच्या शपथविधीत चांदवड-देवळा मतदारसंघाचे आमदार डॉ. राहुल आहेर यांना मंत्रिपद नाकारून विश्वासघात केल्याची भावना चांदवड-देवळा मतदारसंघातील नागरिकांनी व्यक्त केली.

विधानसभा निवडणुकीत प्रचार शेवटच्या टप्प्यात असताना येथील सभेत मंत्रिमंडळाच्या पहिल्या विस्तारातच चांदवड-देवळाकरांना न्याय देईल, तसेच २० हजारांच्या आत लीड असला, तर राज्यमंत्री आणि २० हजारांचा वर लीड दिल्यास कॅबिनेट मंत्रिपद देईन, असा शब्द फडणवीस यांनी दिला होता. त्यांच्या या हाकेला साद देत मतदारसंघाने ५० हजारांचा लीड बहाल करत फडणवीस यांच्यावर विश्वास दाखवला होता.

मात्र, मंत्रिपद न मिळाल्याने नागपूर येथे गेलेल्या डॉ. आहेर समर्थकांना निराश होऊन परतावे लागले. एकंदरीतच फडणवीस यांनी पुन्हा एकदा राजकारण खेळत मतदारांच्या भावनांशी खेळ केल्याने आगामी जिल्हा परिषद व स्वराज्य संस्थांच्या निवडणुकीत नाराज जनता मुख्यमंत्री फडणवीस व भाजपला घरचा ‘अहेर’ देणार का, हे बघणे औत्सुक्याचे ठरणार आहे.