Akkalkuva Mla Amshya Padvi: अक्कलकुवा तालुक्यातील सोरापाडथील ग्रामपंचायतीमध्ये रस्त्यावर ब्लॉक बसवण्याच्या वादातून शुक्रवारी रात्री दोन गटात मोठा राडा झाला. याप्रकरणी शिंदे शिवसेनेचे आमदार आमश्या पाडवी यांच्यासह नऊ जणांविरुद्ध गुन्हा दाखल करण्यात आला आहे.
अक्कलकुवा तालुक्यातील सोरापाडा येथे शुक्रवारी दोन गटात वाद पेटला. याप्रकरणी सोरापाड्याचे पंचायत समिती सदस्य सुधीर गंगाराम पाडवी यांनी पोलिसांत तक्रार दाखल केली आहे. तक्रारीत त्यांनी म्हटले आहे की, २९ नोव्हेंबरला रात्री दहा वाजेच्या सुमारास सोरापाडा गावच्या सरपंच अंजू पाडवी यांचे पती चेतन ओजू पाडवी हे रस्त्यावरील ब्लॉक बसवण्याच्या कामात असताना मी त्यांना हा बसवा ब्लॉक असे म्हणाले. त्याचा राग येऊन चेतन पाडवी यांनी मला व माझ्या भावाला मारहाण केली. त्यानंतर ते निघून गेले. काही वेळाने पुन्हा काही गुंड आणून माझ्या कुटुंबीयांना त्यांनी मारहाण केली. भाजपचे पदाधिकारी सुधीर पाडवी यांनी ग्रामपंचायत निवडणुकीत व विधानसभा निवडणुकीत शिवसेनेविरोधात काम केले, म्हणून आमदार आमश्या पाडवी यांनी गुंड जमवून कुटुंबीयांना अश्लील शिवीगाळ करीत मारहाण केली. तसेच भांडण सोडवण्यासाठी आलेल्या बहिणीलाही अश्लील शिवीगाळ केली. या मारहाणीत चार जणांना दुखापत झाली आहे, असे तक्रारीत नमूद करण्यात आले आहे. तर याप्रकरणी सुधीर पाडवी यांच्या तक्रारीवरुन आमदार आमश्या पाडवी यांच्यासह नऊ जण तसेच काही अज्ञात व्यक्तींविरोधात अक्कलकुवा पोलीस ठाण्यात गुन्हा दाखल करण्यात आला आहे.
Baba Adhav : ईव्हीएम, अदानी ते पंतप्रधान मोदी, अजितदादांच्या समोरच बाबा आढाव यांनी सरकारचे वाभाडे काढले
भाजप जिल्हाध्यक्ष व पदाधिकाऱ्यांवर गुन्हा दाखल
दरम्यान याचप्रकरणी दुसऱ्या गटानेही तक्रार दाखल केली आहे. सोरापाडाच्या सरपंच अंजू पाड़वी यांनी सुधीर पाडवींविरोधात तक्रार दाखल केली. त्यांनी तक्रारीत म्हटले की, सोरापाडा ग्रामपंचायत अंतर्गत गावातील रस्त्यावर पेव्हर ब्लॉक बसविण्याचे काम सुरु आहे. २९ नोव्हेंबरला रात्री १० वाजता सोरापाडा गावातील पेव्हर ब्लॉक बसविण्याचे काम सुरु होते. चेतन ओजु पाडवी हे काम पाहण्यासाठी गेलो असता गावातील सुधीर गंगाराम पाडवी काम बरोबर नाही, असे सांगत आमच्याशी हुज्जत घातली. नंतर त्यांना समजावण्याचा प्रयत्न केला असता सुधीर पाडवी यांनी शिवीगाळ केली. यामध्ये मोठा वाद झाला. चेतन पाडवी यांनी हस्तक्षेप केला असता सुधीर पाडवी यांच्यासह इतरांनी त्यांना मारहाण केली. तसेच गुंड जमवून अश्लील शिवीगाळही केली. तर याप्रकरणी उलटपक्षी अंजू पाडवी यांच्या तक्रारीवरुन शिंदे शिवसेनेचे जिल्हाध्यक्ष किरसिंग गोसावी, भाजपचे पदाधिकारी नागेश पाडवी यांच्यासह बारा जणांविरुद्ध अक्कलकुवा पोलीस ठाण्यात गुन्हा दाखल करण्यात आला आहे.
दोन गटात झालेल्या वादातून सोरापाडामधील वातावरण चांगलेच तापले आहे. आमदार आमश्या पाडवी यांच्याविरुद्ध मोलगी येथे मोर्चाचे आयोजन करण्यात आले आहे. तर आमश्या पाडवींवर खोटे गुन्हे दाखल झाले म्हणून त्यांच्या समर्थनार्थ अक्कलकुवा बंदचे आवाहन करण्यात आले आहे.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड…. आणखी वाचा