भास्करच्या एक्झिट पोलनुसार, सत्ताधारी महायुतीला १२५ ते १४० जागा मिळू शकतात. महायुतीनं एक्झिट पोलच्या अंदाजाप्रमाणे कमाल जागा जरी मिळवल्या, तरीही ते बहुमतापासून दूर राहतील. अन्य पक्ष आणि अपक्षांना २० ते २५ जागा मिळण्याचा अंदाज वर्तवण्यात आलेला आहे. जनकल्याणकारी योजनांचा परिणाम मतदानावर झालेला आहे. पण स्थानिक मुद्दे सर्वात कळीचे ठरलेले आहेत. शहरी भागांपेक्षा ग्रामीण भागांत अधिक मतदान झालेलं आहे, असं एक्झिट पोल सांगतो.

भाजपला ८० ते ९०, शिवसेनेला ३० ते ३५ आणि राष्ट्रवादीला १५ ते २० जागा मिळण्याचा अंदाज भास्करच्या एक्झिट पोलमध्ये वर्तवण्यात आलेला आहे. महाविकास आघाडीत काँग्रेस मोठा भाऊ ठरण्याची शक्यता आहे. काँग्रेसला ५८ ते ६०, राष्ट्रवादीला ५० ते ५५ आणि शिवसेना उबाठाला ३० ते ३५ जागा मिळतील असा कयास आहे. राज ठाकरेंच्या महाराष्ट्र नवनिर्माण सेनेला २ ते ४ जागा मिळण्याचा अंदाज आहे.

गेल्या पाच वर्षांत राज्यातील दोन प्रमुख प्रादेशिक पक्ष फुटले. शिवसेना, राष्ट्रवादी काँग्रेसची दोन शकलं झाली. एकनाथ शिंदे सेनेच्या ४० आमदारांसह भाजपसोबत गेले आणि मुख्यमंत्री गेले. तर अजित पवार ४० आमदारांसह शरद पवारांची साथ सोडत युती सरकारमध्ये सहभागी झाले. त्यामुळे विधानसभा निवडणुकीत जनतेच्या कोर्टात कोणाचे पक्ष खरे या प्रश्नाचा निकाल लागेल असं म्हटलं जात आहे.

भास्करच्या एक्झिट पोलनुसार शिवसेना उबाठा आणि शिवसेना यांच्यातील सामना जवळपास बरोबरीत सुटताना दिसत आहे. दोन्ही पक्षांना प्रत्येकी ३० ते ३५ जागा मिळतील असा अंदाज आहे. पण शिंदेसेनेनं कमी जागा लढवल्या असल्यानं त्यांचा स्ट्राईक रेट अधिक राहील, असा अंदाज आहे. शरद पवारांच्या पक्षाला ५० ते ५५ जागा मिळताना दिसत आहेत. तर अजित पवारांच्या पक्षाला केवळ १५ ते २० जागा मिळण्याचा अंदाज आहे. त्यामुळे पवार विरुद्ध पवार संघर्षात काका पुन्हा एकदा पुतण्याला धोबीपछाड देताना दिसत आहेत.