‘२०१९ मध्ये सुजयला लोकसभा लढवायची होती. तेव्हा आम्ही काय म्हणत होतो, नगर दक्षिण आणि औरंगाबादच्या जागेची काँग्रेस, राष्ट्रवादीनं अदलाबदल करावी. औरंगाबादची जागा काँग्रेस सलग १२ वेळा हरली आहे. राष्ट्रवादी काँग्रेस सलग तीनवेळा नगर दक्षिण मतदारसंघात पराभूत झालेली आहे. त्यामुळे जागांच्या अदलाबदलीचा आग्रह धरला. यासाठी मी पवार साहेबांना दोन-चार वेळा भेटलो. याबद्दल विचार करा म्हटलं. तर ते म्हणाले, तिथले कार्यकर्ते माझे ऐकत नाहीत. आता पवारसाहेबांचं कार्यकर्ते ऐकत नाहीत हे कोणाला पटेल का?’, असा सवाल विखे पाटलांनी विचारला.
Eknath Shinde: शिंदेंच्या निकटवर्तीयाचा गेम? ठाकरेंच्या तगड्या उमेदवारामुळे वाट बिकट, विशेष यंत्रणा कामाला
‘विषय सोडवण्यासाठी मी राहुल गांधींना जाऊन भेटलो. तेव्हा तिथे खरगे साहेब उपस्थित होते. राहुल यांनी माझ्या समोरच अहमद पटेल यांना फोन लावला. राष्ट्रवादी काँग्रेस जागा सोडण्यासाठी तयार नसल्याचं त्यांनी सांगितलं. मग राहुल म्हणाले, तुम्ही राष्ट्रवादी काँग्रेसच्या तिकिटावर सुजयला लढवण्याचा विचार का करत नाही? आता जर मला पक्षाचे राष्ट्रीय अध्यक्षच पक्ष बदलण्याचा सल्ला देत असतील तर राष्ट्रवादी काँग्रेसमध्ये जाण्यापेक्षा मी भाजपमध्येच जाईन ना’, असा किस्सा विखेंनी सांगितला.

‘मी राहुल गांधींना नमस्कार केला. त्यांचे आभार मानले. तुमच्याबद्दल आदर आहे. पण सुजय राष्ट्रवादीच्या तिकिटावर लढणार नाही, असं मी त्यांना नम्रपणे सांगितलं आणि तिथून निघालो. खरगे साहेब लगेच माझ्या मागोमाग खोलीच्या बाहेर आले. राधाकृष्ण, इतकं मनावर घेऊ नको. ५ वर्षांनंतर बघू नको, असं म्हणत त्यांनी समजूत काढण्याचा प्रयत्न त्यांनी केला. आता ५ वर्षांनंतर पक्षाची काय खात्री, असा विचार आम्ही केला. त्यानंतर सुजयनं लगेच देवेंद्र फडणवीसांना फोन केला. साहेब, निर्णय झालेला आहे, असं त्यानं फडणवीसांना कळवलं. जिथे शरद पवारांचे कार्यकर्तेच त्यांचं ऐकत नाही, तिथून तुम्ही निवडणूक लढवायला सांगता, म्हणजे एकप्रकारे राजकीय आत्महत्याच करायला सांगता,’ असं विखे पाटील किस्सा सांगताना शेवटी म्हणाले.