पाथरी विधानसभा मतदारसंघातून राष्ट्रीय समाज पक्षाच्या वतीने सईद खान हे निवडणूकीच्या रिंगणात आहेत. खान यांच्या प्रचारार्थ आज मानवत येथे भव्य जाहीर सभा संपन्न झाली, यावेळी बोलताना महादेव जानकरांनी प्रस्थापितांवर निशाणा साधला आहे.
आजवर चुकीच्या माणसांना निवडून दिलं, तेच तुमच्या जमिनी हडपायला बसलेत; गुहागरमध्ये राज ठाकरेंचं टीकास्त्र
महादेव जानकर म्हणाले की, नुकत्याच झालेल्या लोकसभा निवडणुकीमध्ये परभणी लोकसभा मतदारसंघात मला पराभव पत्करावा लागला. पण आता या विधानसभा निवडणुकीत परभणीच्या चारही विधानसभा मतदारसंघात आपले उमेदवार उभे आहेत. या उमेदवारांना विजयी करून माझ्या पराभवाचा बदला घ्या. राष्ट्रीय समाज पक्ष आता ना महायुतीसोबत आहे ना महाविकास आघाडी सोबत आहे राज्यातल्या तब्बल १३५ जागांवर राष्ट्रीय समाज पक्षाचे उमेदवार उभे आहेत. यातील बहुतांश उमेदवार विजयी होणार असा विश्वास देखील महादेव जानकरांनी व्यक्त केला.

राज्यामध्ये कोणतेही सरकार आले तर ते राष्ट्रीय समाज पक्षाला सोडून येणार नाही. राष्ट्रीय समाज पक्षाची सत्ता स्थापनेत भूमिका महत्त्वाची असेल असेही जानकर म्हणाले. नुकत्याच झालेल्या लोकसभा निवडणुकीत जर मी निवडून आलो असतो तर केंद्रात मंत्री झालो असतो, अशी खंत देखील यावेळी महादेव जानकर यांनी व्यक्त केली. भाजप असो की काँग्रेस असो की राष्ट्रवादी असो यांच्यामध्ये प्रचंड घराणेशाही चालत आहे. इलेक्ट्रॉनिक्स मीडिया काहीही सांगू द्या, आमच्याशिवाय राज्यात सरकार बनणार नाही, असा दावा देखील जानकर यांनी व्यक्त केला आहे.

सईद खान हा सच्चा कार्यकर्ता – जानकर

सईद खान हा सच्चा कार्यकर्ता आहे तो आमदार नसतानाही पाथरी विधानसभा मतदारसंघात त्याने ९०० कोटी रुपयांची विकास कामे खेचून आणली आहेत मुख्यमंत्र्यांकडे पाठपुरा करून पाथरी विधानसभा मतदारसंघात प्रचंड विकास कामे शहीद खान यांनी आणले आहेत त्याला जर आपण आमदार केलं तर तो पुन्हा पाथरी विधानसभा मतदारसंघाचा चेहरा मोहरा बदलेल त्यामुळे सईद खान याला प्रचंड मतांनी विजयी करा. सईद खानला विजयी केलं तर मी पुन्हा एकदा लोकसभा निवडणुकीत परभणी लोकसभा मतदारसंघातून निवडणूक लढविणार असल्याचे त्यांनी जाहीर केले.