म. टा. खास प्रतिनिधी, मुंबई : मुंबईतील वाहतूककोंडी फोडण्यासाठी गोरेगाव-मुलुंड जोडरस्ता (लिंक रोड) वाहनचालकांसाठी महत्त्वाचा ठरणार आहे. या प्रकल्पात गोरेगाव पूर्व येथून ४.७० किलोमीटर लांबीचे दोन भूमिगत जुळे बोगदे असून त्यामुळे प्रवास झटपट होण्यासाठी मदत मिळणार आहे. या बोगद्यांच्या कामासाठी मुंबई पालिकेने कार्यादेश दिले असून सध्या प्राथमिक सर्वे सुरू असल्याची माहिती एका वरिष्ठ अधिकाऱ्याने दिली. बोगद्याचे संरेखन, त्यातील विविध कामे ही आव्हानात्मक आहेत. या जोडरस्ताची विशेषकरून बोगद्याची कामे कोणती, त्यांची वैशिष्ट्य काय यावर टाकलेला प्रकाश…

गोरेगाव-मुलुंड जोडरस्ता चार टप्प्यांत

टप्पा १- नाहूर येथील रेल्वेमार्गावर उड्डाणपूल- ८० टक्के काम पूर्ण

टप्पा २- गोरेगाव-मुलुंड जोडरस्ता रुंदीकरण- ८५ टक्के काम पूर्ण आणि मुलुंड पश्चिम रुंदीकरण

टप्पा ३- रत्नागिरी हॉटेल जंक्शन (गोरेगाव पूर्व) येथील १.२६ किमी लांबीचा उड्डाणपूल, खिंडीपाडा, तानसा जलवाहिनी ते नाहूर येथील रेल्वेमार्गावरील उड्डाणपुलापर्यंत १.८९ किमी लांबीचा उड्डाणपूल आणि जी. जी. सिंग रोड व गोरेगाव-मुलुंड जोडरस्ता प्रकल्प येथे त्रिस्तरीय चक्रीय मार्ग, तसेच मुलुंड पश्चिममधील हेडगेवार जंक्शन येथील उड्डाणपूल- २२ टक्के काम पूर्ण

टप्पा ३- १.६ कमी चा गोरेगावमधील पेटी बोगदा आणि ४.७ कमीचा गेरेगाव पूर्वमधीलच जोड बोगदाचे काम- कार्यादेश जारी आणि प्राथमिक सर्वे सुरू

प्रकल्पग्रस्तांचे पुनर्वसन- १० टक्के काम पूर्ण
RBI MPC Policy: कर्जाच्या हप्त्याचा व्याजदर ‘जैसे थे’ राहणार; व्याजदरात कपात नाहीच… कर्जदारांचा हिरमोड

सर्वाधिक लांबी

या प्रकल्पात गोरेगाव पूर्व येथून ४.७० किलोमीटर लांबीचे दोन जुळे बोगदे असतील. त्यामध्ये प्रत्येकी तीन मार्गिका असतील. देशातील सर्वाधिक लांबीचे हे बोगदे आहेत. गोरेगाव फिल्मसिटी-खिंडीपाडापर्यंत असणाऱ्या या बोगद्याचे काम वेळेत पूर्ण करण्याचे आव्हान महापालिकेसमोर आहे. हे काम पाच वर्षांत पूर्ण केले जाईल. या कामावर देखरेख ठेवण्यासाठी महापालिकेने प्रकल्प व्यवस्थापन सल्लागार नेमला आहे. दोन बोगदे करताना संजय गांधी राष्ट्रीय अभयारण्याच्या काही भागांच्या खालून बोगदा जाणार आहे. कमीत कमी २० ते २५ मिटर आणि जास्तीत जास्त १०० मिटर खोलवर हे बोगदे होतील. या अभयारण्याचा काही भाग येत असला तरीही त्याला कोणताही धक्का न लागता हे काम होणार आहे.

सीसीटीव्ही, अग्निशमन यंत्रणा, जलवाहिनी

सागरी किनारा मार्गातील बोगद्याप्रमाणेच गोरेगाव-मुलुंड जोडरस्तातील दोन बोगद्यांतही सीसीटीव्ही, अग्निशमन यंत्रणा आदी असतील. वेगमर्यादेवर लक्ष ठेवण्यासाठी कॅमेरा आणि फलक लावण्यात येणार आहे. महत्त्वाची बाब म्हणजे, बोगद्यातून मुंबईला सुरळीत पाणीपुरवठा करणारी १८०० मिमी व्यास क्षमतेची भूमिगत जलवाहिनीही टाकण्यात येणार आहे. गोरेगाव-मुलुंड भागातूनच जाणाऱ्या सध्याच्या जमिनीवरील जलवाहिनीला पर्याय म्हणून या बोगद्यातून जलवाहिनी टाकण्यात येईल.

तासाचा प्रवास मिनिटांत

सध्या जोगेश्वरी-विक्रोळी लिंक रोडवरून मुलुंड, ठाणेपर्यंत प्रवास करण्यासाठी एक ते दीड तासाचा प्रवास वेळ लागतो. वाहतूककोंडीमुळे प्रवासाचा वेळ वाढतो. त्यामुळे गोरेगाव-मुलुंड लिंक रोड वाहनचालकांसाठी चांगला पर्याय ठरेल. या प्रकल्पांतर्गत पश्चिम उपनगरांतल्या गोरेगाव येथील पश्चिम द्रुतगती महामार्ग आणि मुलुंड येथील पूर्व द्रुतगती महामार्ग जवळच्या मार्गाने जोडले जाणार आहेत. लिंक रोडमुळे हाच वेळ पंधरा ते वीस मिनिटांत पार करणे शक्य होणार आहे. तर बोगद्यातून पाच ते दहा मिनिटांत झटपट प्रवास होणार असल्याची माहिती देण्यात आली.

प्रकल्पखर्चात वाढ

गोरेगाव-मुलुंड लिंक रोड प्रकल्पाचा खर्च १२ हजार १३ कोटी रूपये आहे. या प्रकल्पासाठी २०२३-२४मध्ये १ हजार १६० कोटी ९५ लाख रुपये तरतूद केली होती. २०२४-२५च्या महापालिकेच्या अर्थसंकल्पात १ हजार ८७० कोटी रुपये तरतूद प्रस्तावित करण्यात आली आहे. उपयोगिता सेवावाहिन्यांच्या अतिरिक्त कामांमुळे प्रकल्प खर्च ४७ कोटी रुपयांनी वाढणार आहे.