प्रदीप भनगे, डोंबिवली : चारित्र्यावर संशय घेत पतीने पत्नीवर चाकू हल्ला केल्याची धक्कादायक घटना घडली आहे. या हल्ल्यात पत्नी जबर जखमी झाली. पोटात चाकू खुपसल्याने जखमी झालेल्या महिलेला तात्काळ मुंबईतील सरकारी रुग्णालयात हलवण्यात आलं आहे. ही धक्कादायक घटना डोंबिवली जवळच्या नांदिवली टेकडी परिसरात सोमवारी पहाटेच्या सुमारास घडली. एकीकडे या हल्ल्यात गंभीर स्वरुपात जखमी झालेली पत्नी सुरेखा मृत्यूशी झुंज देत आहे, तर दुसरीकडे सुरेखावर जीवघेणा हल्ला करुन पसार झालेला पती राजू हिवाळे अद्याप लागला नसून पोलिस त्याचा कसोशीने शोध घेत आहेत.

पूर्वेकडील नांदिवली टेकडी परिसरात राजू आणि सुरेखा हिवाळे हे दाम्पत्य आपल्या दोन मुलांसह राहतात. दोन मुले जन्माला येईपर्यंत संसाराचा गाडा सुखात चाललेला असतानाच हिवाळे दाम्पत्यामध्ये वाद होऊ लागले. राजू हा पत्नी सुरेखाच्या चरित्र्यावर कायम संशय घेत असल्याने दोघांमध्ये वारंवार वाद होत असत. सोमवारी पहाटेच्या सुमारास या कारणावरून दोघांमध्ये वाद झाला. हा वाद विकोपाला गेल्यानंतर संशयाचे भूत मानगुटीवर बसलेल्या राजूने स्वयंपाकघरातील भाजी चिरण्याच्या चाकूने सुरेखावर हल्ला केला.
गुप्तांगात इंजेक्शन आणि मिरची, साथीदारांसह डॉक्टरांचं विकृत कृत्य, मजुरासोबत नेमकं काय घडलं?
पोटावर सपासप वार झाल्याने सुरेखा रक्ताच्या थारोळ्यात पडली. हे पाहून राजूने तेथून पळ काढला. पहाटेची वेळ असल्याने सर्वत्र शांतता होती. अशा वेळी सुरेखाच्या ओरडण्याचा आवाज ऐकून शेजारच्या रहिवाशांनी हिवाळे यांच्या घराकडे धाव घेतली. रक्ताच्या थारोळ्यात पडलेल्या सुरेखाला उचलून केडीएमसीच्या शास्त्रीनगर रुग्णालयात दाखल केले.

तिची प्रकृती अधिकच चिंताजनक झाल्यामुळे तिला तात्काळ मुंबईतील सरकारी रुग्णालयात हलवण्यात आले. याच दरम्यान जखमी सुरेखाने पतीने केलेल्या हल्ल्याचे कारण स्पष्ट केले. तर दुसरीकडे हिवाळे दाम्पत्याच्या मुलाने दिलेल्या तक्रारीनुसार मानपाडा पोलिसांनी गुन्हा दाखल केला आहे. सुरेखला संपवण्याच्या हेतूने केलेल्या हल्ल्यानंतर राजू पसार झाला असून पोलिसांकडून त्याचा शोध सुरू आहे.