ऋषी होळीकर, लातूर : लातूरमध्ये प्रमोद कोटंबे नावाच्या लिफ्टचं काम करणाऱ्या मजुराला डॉक्टर आणि त्यांच्या साथीदारांकडून अमानुष मारहाण झाल्याची धक्कादायक घटना समोर आली आहे. २०२१ मध्ये लिफ्टच्या कामाचा व्यवहार संपलेला असतानाही तुझ्यामुळे माझे एक कोटी रुपयाचे नुकसान झाले असे म्हणत एका ४६ वर्षीय मजुराला, लातूर किडनी विकार तज्ञ डॉक्टर प्रमोद घुगे याने अन्य सहकार्याच्या संगनमताने आपल्या फार्म हाऊसवर तीन दिवस डांबून ठेवले.
या काळात या मजुराच्या गुप्तांगात मिरची आणि इंजेक्शन देत अमानुष छळ करून मारहाण केल्याचा प्रकार समोर आला आहे. याप्रकरणी डॉक्टरांसह सहा जणांविरोधात एमआयडीसी पोलिसातं ॲट्रॉसिटीसह अपहरण, छळ करणे, जिवे मारण्याचा प्रयत्न या कलमान्वये गुन्हा दाखल करण्यात आला आहे.
लातूर शहरातील आंबेजोगाई रोडवर डॉक्टर प्रमोद घुगे यांचे हॉस्पिटल आहे. या हॉस्पिटलमध्ये लिफ्ट बसवण्याचे काम त्यांनी २०२१ मध्ये आनंद कोटंबे यांना ३३ लाख रुपयांना दिले होते. त्यातील १९ लाख रुपये धनादेशाद्वारे कुटुंबीयांना दिले. त्यानुसार कुटुंबियांनी काम सुरू केले परंतु लिफ्टचे काम जवळपास पूर्ण झालेले असतानाही डॉक्टर घुगे यांनी कोटंबे यांचे काम मध्येच थांबून मला दुसऱ्याकडून काम करून घ्यायचे आहे असे सांगत उर्वरित रक्कम दिली नाही.
यामध्ये दोन वर्ष गेले. त्यानंतर २४ मार्च रोजी प्रमोद घुगे आणि इतर पाच जणांनी मिळून आंबेजोगाई रोडवरुन कारमध्ये कोटंबे यांना बसवले आणि आपल्या फार्म हाऊस वर नेले. त्या ठिकाणी त्याचे हात पाय बांधून लोखंडी रॉड, चामड्याचा बेल्ट आणि लाथा बुक्क्यांनी मारहाण केली. त्यानंतर कोटंबे यांच्या गुप्तांगात इंजेक्शन दिले आणि मिरची टाकून त्यांना म्हशीच्या गोठ्यात घेऊन गेले. हा प्रकार तीन दिवस चालला आणि २८ मार्च रोजी त्यांना लातूरच्या रेल्वे स्थानकात सोडून हे सर्व निघून गेले.
आईला निर्दयीपणे संपवलं; पुरावे नष्ट, मात्र कपाळावरील जखमेनं फोडलं बिंग अन् मुलाचा गेम ओव्हर
गंभीर अवस्थेत कोटंबे यांना नागरिकांनी रुग्णालयात दाखल केले आणि त्यानंतर डॉक्टर प्रमोद घुगे, सुनील शिरसाठ, नाना दिघे आणि इतर तीन जण अशा सहा जणांविरोधात अट्रोसिटी अंतर्गत गुन्हा दाखल केला आहे. सर्व आरोपी फरार आहेत. याचा पुढील शोध एमआयडीसी पोलीस करत आहेत.