मुंबई : शिवसेना (उद्धव बाळासाहेब ठाकरे) पक्षाने राज्यातील १७ लोकसभा मतदारसंघांतील उमेदवारांची घोषणा केल्यानंतर दुसऱ्याच दिवशी मुख्यमंत्री एकनाथ शिंदे यांच्या नेतृत्वातील शिवसेनेने आपली पहिली उमेदवार यादी जाहीर केली. आठ उमेदवारांच्या यादीत रामटेकचे खासदार कृपाल तुमाने यांचा अपवाद वगळता ७ विद्यमान खासदारांना पुन्हा संधी देत निवडणुकीच्या रिंगणात उतरवण्यात आले आहे. तुमाने हे शिंदे गटातील पत्ता कट झालेले पहिले विद्यमान खासदार ठरले आहेत. मात्र त्यासोबतच आणखी चौघेही गॅसवर आहेत.

एकनाथ शिंदे यांचे आठ उमेदवार

मावळ – श्रीरंग बारणे
हिंगोली – हेमंत पाटील
हातकणंगले – धैर्यशील माने
कोल्हापूर – संजय मंडलिक
बुलढाणा – प्रतापराव जाधव
शिर्डी – सदाशिव लोखंडे
दक्षिण मध्य मुंबई – राहुल शेवाळे
रामटेक – राजू पारवे

गजानन कीर्तिकर यांची माघार

उत्तर पश्चिम (वायव्य) मुंबई लोकसभा मतदारसंघातून विद्यमान खासदार गजानन कीर्तिकर यांचे सुपुत्र अमोल कीर्तिकर यांना शिवसेनेच्या उद्धव गटाने रिंगणात उतरवले आहे. आपल्याविरोधात शड्डू ठोकणाऱ्या लेकाची समजूत काढण्याचा प्रयत्न गजानन कीर्तिकर यांनी केला होता. मात्र अमोल कीर्तिकर हे निर्णयावर ठाम आहेत. त्यामुळे मुलाविरुद्ध संघर्ष टाळण्यासाठी गजानन कीर्तिकरांनी एक पाऊल मागे घेत निवडणुकीतून माघार घेतल्याचं बोललं जातं. त्यानंतर कालच पक्षप्रवेश करणारे अभिनेते आणि माजी खासदार गोविंदा यांचं नाव या जागेसाठी चर्चेत आहे.
राष्ट्रवादीच्या माजी खासदाराला ठाकरेंकडून उमेदवारी, पवार गटाच्या बैठकीत नेत्यांची नाराजी

भावना गवळी, हेमंत गोडसे वेटिंगवर

दुसरीकडे, यवतमाळ वाशीमच्या खासदार भावना गवळी, नाशिकचे खासदार हेमंत गोडसे वेटिंगवर आहेत. नाशिकमध्ये भाजप, अजित पवार यांची राष्ट्रवादी काँग्रेसही लढण्यास उत्सुक आहे. तर महायुतीच्या उंबरठ्यावर असलेल्या राज ठाकरे यांच्या महाराष्ट्र नवनिर्माण सेनेलाही ही जागा सोडली जाण्याची शक्यता वर्तवली जात आहे. परंतु गोडसेंनी मुख्यमंत्र्यांच्या घराजवळ शक्तिप्रदर्शन केलं. त्यांच्यासह भावना गवळी यांनीही मुंबईत तळ ठोकत फील्डिंग लावल्याचं बोललं जात आहे.

सीएमपुत्राचंच पहिल्या यादीत नाव नाही

विशेष म्हणजे, खुद्द मुख्यमंत्र्यांचे सुपुत्र खासदार डॉ. श्रीकांत शिंदे यांच्या नावाचाच पहिल्या यादीत समावेश नाही. त्यामुळे शिंदेंच्या लेकाचंच नाव सेफ झोनमध्ये नसल्याची कुजबूज आहे. याशिवाय पालघरचे खासदार राजेंद्र गावित यांच्याविषयीही नाराजी असल्याची माहिती असल्याने त्यांचाही पत्ता कट होऊन खांदेपालट होण्याची शक्यता आहे. याशिवाय ठाण्याचा खासदार शिंदेंसोबत नसला, तरी त्यांचं होमटाऊन असलेली आणि शिवसेना युतीत पारंपरिकरित्या लढवत आलेली जागा कोण लढवणार, हे स्पष्ट झालेलं नाही.
‘धैर्य’ सुटलं, तिकीट जाण्याची ‘भावना’, ‘गोड’सेंच्या मनी कटुता, भयभीत खासदारांची फौज ‘वर्षा’वर
एकनाथ शिंदे यांच्यासोबत शिवसेनेचे १३ खासदार आहेत. त्यापैकी रामटेकची सीट जरी शिंदेंकडे राहिली असली, तरी विद्यमान खासदाराचा पत्ता कट झालाय. आता उर्वरित बारांपैकी सात जणांना तिकीटरुपी दिलासा मिळाला आहे. त्याव्यतिरिक्त राहिलेल्या पाचपैकी कीर्तिकरांनी माघार घेतली आहे. त्यामुळे आता शिल्लक चौघांचं काय होणार, हे लवकरच समजेल.
Read Latest Maharashtra News Updates And Marathi News

टांगती तलवार असलेले पाच मतदारसंघ – विद्यमान खासदार

यवतमाळ वाशीम – भावना गवळी
नाशिक – हेमंत गोडसे
पालघर – राजेंद्र गावित
कल्याण – श्रीकांत शिंदे
मुंबई उत्तर पश्चिम – गजानन कीर्तिकर