मुंबई : शिवसेना उद्धव बाळासाहेब ठाकरे पक्षाने राज्यातील १६ लोकसभा मतदारसंघांमधील उमेदवारांची घोषणा उमेदवारी यादीत सरशी घेतल्यानंतर आज मुख्यमंत्री एकनाथ शिंदे यांच्या नेतृत्वातील शिवसेना पक्षाने उमेदवारांची आपली पहिली यादी जाहीर केली आहे. ८ उमेदवारांच्या यादीत रामटेकचे खासदार कृपाल तुमाने यांचा अपवाद वगळता ७ विद्यमान खासदारांना पुन्हा उमेदवारी देऊन निवडणुकीच्या रिंगणात उतरविण्यात आले आहे. उद्धव ठाकरे यांच्या १६ तसेच एकनाथ शिंदे यांच्या ८ उमेदवारांच्या घोषणेने उभय गटातील काही ठिकाणच्या लढती स्पष्ट झाल्या आहेत.

कोण कोणाच्या विरोधात?

१) दक्षिण मध्य मुंबई मतदारसंघात ठाकरे गटाचे नेते अनिल देसाई आणि शिंदे गटाचे राहुल शेवाळे यांच्यात लढत होईल.
२) शिर्डी लोकसभा मतदारसंघात सदाशिव लोखंडे यांना शिंदेंकडून उमेदवारी तर ठाकरे गटाकडून भाऊसाहेब वाकचौरे यांना उमेदवारी जाहीर झाली आहे. शिर्डी ही जागा अनुसूचित जातीसाठी राखीव आहे
३) बुलढाण्यात ठाकरे गटाकडून नरेंद्र खेडेकर यांना उमेदवारी तर आता शिवसेना शिंदे गटाकडून प्रतापराव जाधव यांना उमेदवारी देण्यात आली आहे. ही कट्टर तोडीस तोड होण्याची शक्यता आहे.
४) मावळमध्ये ठाकरे गटाने संजोग वाघेरे पाटील यांना उमेदवारी दिली आहे तर शिंदे गटाकडून चौथ्यांदा लोकसभेत पाऊल ठेवण्यासाठी श्रीरंग बारणे यांना उमेदवारी दिली आहे.
५) हिंगोलीत ठाकरे गटाकडून नागेश पाटील-आष्टीकर यांना उमेदवारी जाहीर झाली आहे तर शिंदे गटाकडून खासदार हेमंत पाटील यांना उमेदवारी जाहीर झाली आहे.
६) रामटेकमधून काँग्रेस पक्षाने रश्मी बर्वे यांना उमेदवारी दिली आहे तर शिवसेनेने (एकनाथ शिंदे गट) नुकतेच काँग्रेसमधून आलेल्या राजू पारवे यांना उमेदवारी दिल्याने या दोघांत आता तुल्यबळ लढत होईल. रामटेक ही जागा अनुसूचित जातीसाठी राखीव आहे.
७) हातकणंगले मतदारसंघातून शिंदे यांनी धैर्यशील माने यांना उमेदवारी दिली आहे. तिथे माजी खासदार राजू शेट्टी त्यांच्याविरोधात लढतील. महाविकास आघाडी तिथे पाठिंबा देणार की नवा उमेदवार रिंगणात उतरविणार, हे अद्याप अस्पष्ट आहे.
८) कोल्हापूरमधून काँग्रेस पक्षाने शाहू महाराज छत्रपती यांना उमेदवारी दिली आहे तर आज शिवसेनेने विद्यमान खासदार संजय मंडलिक यांना पुन्हा संधी दिली आहे.
एकनाथ शिंदे यांच्या शिवसेनेचे ८ उमेदवार जाहीर, कृपाल तुमाने यांचं तिकीट कापलं, कुणाकुणाला संधी? पाहा…

एकनाथ शिंदे यांचे आठ बिनीचे शिलेदार!

मावळ- श्रीरंग बारणे
हिंगोली-हेमंत पाटील
हातकणंगले- धैर्यशील माने
कोल्हापूर- संजय मंडलिक
बुलढाणा- प्रतापराव जाधव
रामटेक-राजू पारवे
शिर्डी- सदाशिव लोखंडे
दक्षिण मध्य मुंबई- राहुल शेवाळे