मुंबई : मुंबईसह देशातील सात प्रमुख शहरांमध्ये २०२४ मधील पहिल्या तिमाहीत घरखरेदीने उच्चांक गाठला आहे. गेल्या वर्षातील पहिल्या तिमाहीतील सुमारे १ लाख १४ हजार घरांच्या विक्रीच्या तुलनेत यंदाच्या तिमाहीत १ लाख ३० हजार घरांची विक्री झाली आहे. ही वाढ १४ टक्के आहे. त्यात मुंबई महानगर प्रदेश, पुण्याचा वाटा तब्बल ५१ टक्के आहे. मुंबई महानगर प्रदेशात २४ टक्के आणि पुण्यात १५ टक्के वाढ नोंदवली गेली आहे.
मुंबई महानगरासह इतर प्रमुख शहरांत गेल्या वर्षातील तिमाहीच्या तुलनेत एक टक्का वाढ झाली आहे. त्यात मुंबई महानगर आणि हैद्राबादने ५१ टक्के वाटा आहे. या घरांच्या खरेदीत ४० ते ८० लाख रुपयांच्या मध्यम श्रेणीतील घरांचा सर्वात जास्त वाटा राहिला आहे. या श्रेणीतील घरांची विक्री संख्या ३३ टक्के असून दीड कोटी रुपयांपर्यंत घरांची टक्केवारी २५ टक्के, ८० लाख ते १.५ कोटी रुपयांपर्यंतच्या प्रीमियम घरांची टक्केवारी २४ टक्के आणि परवडणाऱ्या घरांचे प्रमाण १८ टक्के आहे. यंदाच्या वर्षातील तिमाहीत घरांच्या विक्रीने नवीन उच्चांक गाठला आहे.
‘अॅनारॉक’च्या अहवालात देशातील सात प्रमुख शहरांतील घरांच्या विक्रीचा आढावा घेण्यात आला आहे. अॅनारॉकचे अध्यक्ष अनुज पुरी यांनी मुंबई महानगर प्रदेश आणि पुण्यातील घरांच्या विक्रीची टक्केवारी ही सात शहरांच्या तुलनेत ५१ टक्के एवढी आहे. मुंबई महानगरात विक्रमी २४ टक्के वाढ झाली असून पुण्यात १५ टक्क्यांची वाढ झाल्याचे निरीक्षण नोंदवले आहे.
मुंबई महानगर प्रदेशात यंदाच्या तिमाहीत ३३,८०० नवीन घरे उपलब्ध झाली असून ही संख्या गतवर्षीच्या पहिल्या तिमाहीपेक्षा ९ टक्के घट आहे. त्यामध्ये ८० लाखांपर्यंतच्या घरांचा पुरवठा ५९ टक्क्यांपेक्षा अधिक आहे. पुण्यात यंदाच्या तिमाहीत १८,७७० नवीन घरे उपलब्ध झाली असून २०२३च्या पहिल्या तिमाहीच्या तुलनेत त्यात ३ टक्के घट झाली आहे. गतवर्षीच्या पहिल्या तिमाहीत पुण्यात १९,४२० घरांचा पुरवठा झाला होता. हैद्राबादमध्ये गतवर्षीच्या पहिल्या तिमाहीच्या तुलनेत ५७ टक्के म्हणजे एकूण २२,९६० घरांचा पुरवठा झाला आहे. त्यापैकी, ३३ टक्के वाटा १.५ कोटी रुपयांच्या श्रेणीतील घरांचा समावेश आहे.
मुंबई क्षेत्रात विक्रीचा आकडा ४२,९९०
२०२४ च्या तिमाहीत सुमारे १,३०,१७० घरांची विक्री झाली असून ही वाढ २०२३ च्या पहिल्या तिमाहीपेक्षा १४ टक्के अधिक आहे. नोएडा, मुंबई महानगर प्रदेश, बंगळुरू, पुणे, हैद्राबादमधील एकत्रित एकूण वाटा ९१ टक्के आहे. मुंबई महानगर क्षेत्रात सर्वाधिक म्हणजे ४२,९९० घरांची विक्री झाली असून ही वाढ २०२३ मधील पहिल्या तिमाहीपेक्षा २४ टक्के जास्त आहे. २०२३ मधील पहिल्या तिमाहीत ३४,६९० घरांची विक्री झाली होती.