शैलेश धुंदी, अमरावती: अमरावती, अकोला, बुलढाणा, वाशीम व यवतमाळ जिल्ह्यांतून दरवर्षी सुमारे २५ हजारांवर विद्यार्थी इंजिनीअरिंगची पदवी घेऊन बाहेर पडतात. स्थानिक पातळीवर रोजगाराची सोय नसल्याने हे सारे पुण्या-मुंबईला धाव घेतात. ही धाव थांबवून पश्चिम विदर्भाच्या विकासासाठी आयटी पार्क उभारण्याचा प्रस्ताव सादर करण्यात आला. याला मंजुरी मिळाल्याने या पार्कसाठी आता जागेचा शोध सुरू करण्यात आला आहे.अमरावतीच्या नांदगावपेठ येथील पंचतारांकित औद्योगिक वसाहतीमध्ये आयटी पार्क उभारले जावे, अशी मागणी एमआयडीसी असोसिएशन अमरावतीचे अध्यक्ष किरण पातूरकर यांनी केली. पाच महिन्यांपासून या पार्कसाठी पाठपुरावा सुरू आहे. मुख्यमंत्री एकनाथ शिंदे, उपमुख्यमंत्रीद्वय देवेंद्र फडणवीस, अजित पवार यांच्यासह उद्योगमंत्र्यांशी चर्चा करण्यात आली. हा प्रस्ताव मंजूर झाल्यास बेरोजगारांच्या हाताला काम मिळणार असा विश्वास व्यक्त करण्यात आला. एमआयडीसीत सुमारे ५० एकर जागेवर हे आयटी पार्क प्रस्तावित आहे. हा प्रस्ताव मंजूर झाल्यास पाचही जिल्ह्यांतील अभियंत्यांच्या हाताला स्थानिक पातळीवर काम उपलब्ध होऊन इतर पूरक उद्योगही उभे राहतील, असा विश्वास तज्ज्ञांकडून व्यक्त होत आहे. मुळात अमरावतीमध्ये रेल्वे, विमान व दळणवळणाची सर्व सुविधा आहे. समृद्धी महामार्गाने हा जिल्हा जोडला गेला आहे.

नव्या राष्ट्रीय शैक्षणिक धोरणासाठी पोषक

अमरावती येथे आयआयटी पार्क उभारण्यात आल्यास नवीन राष्ट्रीय शैक्षणिक धोरण राबविणे अधिक सोपे होणार आहे. या धोरणानुसार विद्यार्थ्यांना त्यांचा अभ्यासक्रम पूर्ण केल्यानंतर कारखान्यात किमान सहा महिने इंटर्नशिप करणे आवश्यक आहे. अभियांत्रिकीच्या विद्यार्थ्यांसाठी अमरावतीमध्ये आयटी पार्क नसल्याने त्यांना अडचणीला सामोरे जावे लागते. ही सोय झाल्यास अमरावतीच्या विद्यार्थ्यांना दिलासा मिळणार असल्याचेही तज्ज्ञांकडून सांगण्यात येत आहे.

शासनाकडून अपेक्षा

– जागेचा शोध घेऊन आयटी पार्कची बांधणी करण्यात यावी.

– सर्व सुविधा उपलब्ध करून देण्यात याव्यात.

– अभियांत्रिकी महाविद्यालय व आयटी कंपनी यांच्यात एमओयू करावा.

– पुणे-शेगाव वंदे भारत गाडी अमरावतीपर्यंत वाढविण्यात यावी.

लााभार्थी जिल्हे

– अमरावती

– अकोला

– वाशीम

– यवतमाळ

– बुलढाणा