म. टा. खास प्रतिनिधी, मुंबई: मुंबईसह देशभरात रविवारी होळीचा उत्साह, आनंद असताना भांडुपमधील एका कुटुंबात मात्र शुकशुकाट होता. संपूर्ण कुटुंब तणावात होते. सगळीकडे शोधाशोध, धावपळ सुरू होती. कुटुंबातील पाच वर्षांची ‘खुशी’ गायब झाली होती. बंदोबस्तात व्यग्र असलेल्या भांडुप पोलिसांनी प्रकरणाचे गांभीर्य ओळखून रात्रभर लहानगीचा शोध सुरू केला. या मुलीचे अपहरण झाले असून तिची ठाण्यातील दोन महिलांना एक लाख रुपयांना विक्री करण्यात आल्याचे सलग दहा ते बारा तास केलेल्या तपासाअंती उघड झाले. पोलिसांनी मुलीची सुखरूप सुटका करत, तिला विकत घेणाऱ्या दोन बारबाला आणि विकणाऱ्या दोघी अशा चौघींना अटक केली.भांडुपमध्ये राहणारी पाच वर्षांची मुलगी खुशी (बदललेले नाव) रविवारी होळीनिमित्त फुगे आणण्यासाठी दुकानात गेली ती परतलीच नाही. कुटुंबाने तसेच शेजाऱ्यांनी तिचा संपूर्ण परिसरात शोध घेतला, मात्र ती सापडत नव्हती. अखेर मुलगी बेपत्ता झाल्याची खबर भांडुप पोलिसांपर्यंत पोहोचली. पाच वर्षांची लहानगी गायब असल्याने वरिष्ठ पोलिस निरीक्षक दत्तात्रय खंडागळे यांच्या मार्गदर्शनाखाली उपनिरीक्षक अभिजीत टेकवडे, विशाल मोरे यांच्यासह सावंत, वाघ, कोळी, कचरे, आटपाडकर, गवळी, गरुड यांची वेगवेगळी पथके तयार करण्यात आली. वेगवेगळ्या माध्यमातून खुशीचा शोध सुरू असताना परिसरात राहणाऱ्या एका तरुणाने तिला खुशबू गुप्ता या तरुणीसोबत रिक्षात बसताना पाहिल्याचे सांगितले. हाच धागा पकडून पोलिसांनी तपास सुरू केला. तांत्रिक पुराव्यांचे विश्लेषण करीत प्रथम खुशबू हिला दहिसर येथून ताब्यात घेण्यात आले. सुरुवातीला उडवाउडवीची उत्तरे देणाऱ्या खुशबूने मैना दिलोड (३९) या महिलेच्या मदतीने खुशीला पळविल्याचे कबुल केले.

माजी अधिकारी फोन टॅपिंगमध्ये? १ लाख कॉल्स टॅप केलेले, तेलंगणमध्ये ३० जण चौकशीच्या फेऱ्यात

एक लाखात विक्री

पोलिसांनी खुशबू आणि मैना या दोघींची कसून चौकशी केली असता, त्यांनी एक लाख रुपयांना खुशीची विक्री केल्याचे सांगितले. त्यानुसार भांडुप पोलिसांनी ठाण्याच्या बाळकुम परिसरात जाऊन दिव्या सिंग आणि पायल शहा या दोन महिलांना ताब्यात घेतले. या दोघींच्या ताब्यातून खुशीची सुखरूप सुटका केली. मुलीसाठी खुशबू हिला ऑनलाइन दहा हजार रुपये पाठविण्यात आले होते.

नेमके कारण गुलदस्त्यातच

दिव्या सिंग आणि पायल शहा या दोघी बारबाला असून एकत्र राहतात. ‘आम्हाला एक मुलगी दत्तक घ्यायची होती म्हणून खुशीला विकत घेतले’, असे त्या सांगत आहेत. मात्र, यात फारसे तथ्य नसल्याचे पोलिसांनी म्हटले आहे. या दोघींनी खुशीला नेमके कशासाठी खरेदी केले होते हे अद्याप गुलदस्त्यातच आहे.