म. टा. वृत्तसेवा, नवी मुंबई: आठवडाभरापूर्वी अटल सेतूवरून समुद्रात उडी मारलेल्या महिला डॉक्टरचा अद्याप शोध लागलेला नसल्याने कुटुंबियांची चिंता वाढली आहे.
काय प्रकरण?
मुंबईत दादर येथे राहणाऱ्या ४३ वर्षीय डॉ. किंजल शहा या मागील आठवड्यात सोमवारी दुपारी घराबाहेर पडल्या आणि टॅक्सीने अटल सेतूवर जाऊन टॅक्सी थांबवून पुलावरून समुद्राच्या पाण्यात उडी मारली. या घटनेची माहिती मिळताच पोलिसांनी त्यांचा शोध सुरू केला होता. दरम्यान, आपण आत्महत्या करत असल्याची चिठ्ठी त्यांनी घरी लिहून ठेवल्याचे समोर आले होते. पेशाने डॉक्टर असलेल्या किंजल या मागील आठ ते दहा वर्षांपासून नैराश्याने ग्रस्त असल्याचे त्यांच्या वडिलांनी सांगितले होते.
मागील आठवडाभरापासून स्थानिक सुरक्षारक्षक आणि पोलिसांच्या मदतीने किंजल यांचा शोध सुरू आहे. परंतु, रविवार रात्रीपर्यंत त्यांचा शोध लागला नसल्याचे न्हावा शेवा पोलिस ठाण्याचे वरिष्ठ पोलिस निरीक्षक राजेंद्र कोटे यांनी सांगितले. त्यामुळे त्यांच्या कुटुंबीयांच्या चिंता वाढल्या आहेत.