म. टा. प्रतिनिधी, पुणे : मध्य प्रदेशातील पैलवानाला सुपारी देवून मेव्हण्याला जीवे मारण्याचा प्रयत्न करणाऱ्यांना गुन्हे शाखेच्या पोलिसांनी अटक केली. या प्रकरणी महेश महादेव ठोंबरे (वय २८, रा. संगमवाडी, सध्या रा. आगरवाल तालीम, कसबा पेठ) आणि अश्विनीकुमार शेषराव पाटील (वय ५२, रा. कमलनिवास, आपटे रस्ता) यांना अटक करण्यात आली आहे. हा हल्ला संपत्तीच्या वादातून झाला असल्याचे प्राथमिक तपासात दिसून आल्याचे पोलिसांनी स्पष्ट केले.
काय आहे प्रकरण?
या प्रकरणी ३१ वर्षीय तरुणाने डेक्कन पोलिस ठाण्यात तक्रार दिली होती. तक्रारदार तरुणाचे आपटे रस्ता परिसरात हॉटेल आहे. चार फेब्रुवारीला रात्री साडेदहाच्या सुमारास तक्रारदार हॉटेल बंद करून घरी जात होते. त्या वेळी दोघे जण पत्ता विचारण्याच्या बहाण्याने तक्रारदाराजवळ आले. तक्रारदाराच्या तोंडावर लाल तिखट टाकून हत्याराने वार केले. यात तक्रारदार गंभीर जखमी झाले. या प्रकरणी खुनाचा प्रयत्न केल्याबाबत गुन्हा दाखल आहे. या गुन्ह्याचा समांतर तपास गुन्हे शाखेच्या युनिट एककडून करण्यात येत होता. पोलिस अंमलदार दत्ता सोनवणे, महेश बामगुडे, शशिकांत दरेकर, अभिनव लडकत, नीलेश साबळे यांनी गुन्ह्याच्या घटनास्थळापासून बालगंधर्व रंगमंदिर, वृद्धेश्वर घाट, पुणे महापालिका, गाडीतळ चौक, मालधक्का चौक या ठिकाणचे सीसीटीव्ही फुटेज तपासले. त्यात संशयित आरोपी पुणे स्टेशन येथे गेल्याचे दिसून आले.
५० हजार रुपायांची सुपारी
पोलिसांनी केलेल्या तांत्रिक विश्लेषणाद्वारे निष्पन्न झालेला आरोपी महेश ठोंबरे याला ताब्यात घेऊन त्याच्याकडे तपास केला. त्या वेळी तक्रारदाराचे दाजी अश्विनीकुमार शेषराव पाटील (वय ५२, रा. कमलनिवास, आपटे रस्ता) यांच्या सांगण्यावरून ५० हजार रुपायांची सुपारी दिल्याचे समोर आले. त्यावरून मध्य प्रदेशातील पैलवान फैजल खान आणि त्याच्या दोन मित्रांनी तक्रारदावर हल्ला केल्याचे सांगितले. त्यानुसार युनिट एकच्या पथकाने पाटील याला कार्यालयात बोलावून चौकशी केली. त्या वेळी पाटील याने गुन्ह्याची कबुली दिली.