म. टा. खास प्रतिनिधी मुंबई : सायबर गुन्हेगार फसवणुकीसाठी काय काय करतील, याचा अंदाज करणेच कठीण झाले आहे. कुरिअरमध्ये, पार्सलमध्ये ड्रग्ज आहे, असे सांगत गुन्हा दाखल करून अटकेची धमकी दाखवत पैसे उकळले जात होते. आता तर बलात्काराच्या आरोपांची भीती दाखवली जात आहे. केंद्रीय शाळेतील एका शिक्षकाकडून मुलाला बलात्काराच्या आरोपाखाली अटक करण्याची धमकी देत सुमारे दीड लाख रुपये उकळण्यात आले. याप्रकरणी कांजूर मार्ग पोलिस ठाण्यात गुन्हा दाखल करण्यात आला आहे.सायन कोळीवाडा येथील केंद्रीय शाळेमध्ये शिक्षक असलेल्या रामकुमार (बदललेले नाव) यांचा मुलगा उत्तर प्रदेश येथील एका प्रतिष्ठित कॉलेजमध्ये शिक्षण घेत आहे. १६ मार्च रोजी रामकुमार यांना एका अनोळखी व्यक्तीचा फोन आला आणि त्याने सीबीआय अधिकारी असल्याचे सांगितले. रुपेशकुमार तुमच्या मुलाचे नाव आहे का? असे विचारताच त्यांनी त्याला होकारार्थी उत्तर दिले. त्यावर कॉलेजमधील काही तरुणांनी एका मुलीवर बलात्कार केला असून त्यामध्ये तुमच्या मुलाचाही सहभाग आहे, असे या कथित अधिकाऱ्याने सांगितले. रुपेशकुमार याला गुन्ह्यात आरोपी न करण्यासाठी पैसे द्यावे लागतील, असे हा अधिकारी म्हणाला. त्यामुळे मुलाला अटक न करण्याची विनवणी त्यांनी केली. अधिकारी सांगेल तसे थोडे-थोडे करून दीड लाख रामकुमार यांनी पाठवले.
कथित सीबीआय अधिकाऱ्याचा पुन्हा फोन आला आणि त्याने आणखी पैशाची मागणी केली. त्यावेळी पैसे नसल्याने आणि सीबीआयच्या त्या कथित अधिकाऱ्याची पैशांची मागणी संपत नसल्याने रामकुमार याला संशय आला. त्याच्या पत्नीने उत्तर प्रदेश येथील रुपेशकुमार याला व्हिडिओ कॉल केला. त्यामध्ये तो हॉस्टेलमध्ये अभ्यास करीत असल्याचे दिसले. त्याला बलात्काराच्या घटनेबाबत विचारले असता त्याने असे काही झालेच नसल्याचे सांगितले. आपला मुलगा सीबीआय कार्यालयात नाही तर हॉस्टेलमध्ये असल्याचे पाहून रामकुमार यांना आपली फसवणूक झाल्याचे लक्षात आले. त्यांनी याबाबत तात्काळ कांजूर मार्ग पोलिस ठाण्यात तक्रार केली.