म. टा. प्रतिनिधी ठाणे : कळवा येथील शांतीनगरमध्ये खोलीमध्ये ई-बाईकच्या बॅटरीचा स्फोट होऊन या खोलीची आणि बाजूच्या खोलीची एकत्रित भिंत आणि पत्रे कोसळून झालेल्या घटनेमध्ये तिघेजण जखमी झाले आहेत. जखमींमध्ये दोन महिला असून ही घटना मंगळवारी रात्री घडली. जखमींवर कळव्यातील छत्रपती शिवाजी महाराज रुग्णालयात उपचार चालू आहेत. नेमका बॅटरीचा स्फोट कसा झाला याबाबत गूढ निर्माण झाले आहे.
कापूस, तुरीचे दर कडाडले, ९ हजारांचा उच्चांक गाठणार?
शांतीनगरमध्ये मफतलाल कम्पाउंडमधील सावित्रीदेवी वेल्फेअर सोसायटीच्या चाळीतील विश्वनाथ गुप्ता यांच्या मालकीच्या खोलीमध्ये ठेवलेल्या ई-बाईकची ५६ वॉट पॉवरच्या लिथियम बॅटरीचा मंगळवारी रात्री १०.३० वाजता अचानक स्फोट झाला. त्यामुळे या खोलीचे पत्रे आणि या खोलीच्या बाजूला असलेल्या लाल बादशाह यांच्या मालकीची खोलीची एकत्रित भिंत पडली. तासभरानंतर या घटनेची माहिती मिळाल्यानंतर घटनास्थळी आपत्ती व्यवस्थापन कक्षाचे कर्मचारी दाखल झाले.या घटनेमध्ये कुसुमदेवी विश्वनाथ गुप्ता (२८), लाल बादशाह (६६) आणि मेहबुबी लाल बादशहा (५६) जखमी झाले आहेत. त्यांना तत्काळ उपचारासाठी रुग्णालयात दाखल केले. याठिकाणी धोकापट्टी बांधून तात्पुरत्या स्वरूपात दोन्ही खोल्या बंद केल्या आहेत, अशी माहिती पालिकेच्या आपत्ती व्यवस्थापन कक्षाने दिली.