नांदेड: लोकसभा निवडणुकीचा बिगुल वाजला आहे. सर्वच पक्षांकडून उमेदवारांची घोषणा केली जातं आहे. त्यातच आज ओबीसी नेते प्रकाशअण्णा शेंडगे यांच्या ओबीसी बहुजन पक्षाने राज्यातील देखील आपला पहिला उमेदवार जाहीर केला आहे. नांदेड लोकसभेसाठी ऍड.अविनाश भोसीकर यांच्या नावाची घोषणा करण्यात आली. सोमवारी आयोजित पत्रकार परिषदेदरम्यान ही घोषणा करण्यात आली आहे.

कोण आहेत अविनाश भोसीकर?

अविनाश भोसीकर हे ओबीसी बहुजन पक्षाचे मराठवाडा अध्यक्ष आहेत. शिवाय चळवळीतील युवा नेतृत्व आहे. विद्यार्थी दशेपासून भोसीकर यांच्या कार्याची सुरुवात झाली असून एस.एफ.आय मध्ये ते आक्रमक विद्यार्थी म्हणून परिचित झाले होते. लिंगायत चळवळीत त्यांनी मोठे कार्य केले आहे. मराठा आरक्षणाचा प्रश्न पेटल्यानंतर राज्यात ओबीसीच्या सभा घेण्यात आल्या. नांदेडमध्ये देखील ओबीसीची सभा पार पडली. या सभेदरम्यान ओबीसी आगामी सर्व निवडणुका लढणार असल्याची घोषणा प्रकाश शेंडगे यांनी केली होती. त्यानंतर शेंडगे यांनी ओबीसी बहुजन पक्षाची स्थापना केली.

ओबीसी आणि वंचित एकत्र येऊन लोकसभा निवडणूक लढण्याबाबत प्रकाश शेंडगे यांनी प्रकाश आंबेडकर यांना साद देखील घातली होती. मात्र अद्याप पर्यंत निर्णय झाला नाही. दरम्यान लोकसभा निवडणूक जाहीर झाल्याने ओबीसी बहुजन पक्षाने नांदेड मध्ये राज्यातील पहिला उमेदवार जाहीर केला आहे. ओबीसी, बहुजन, आणि मुस्लिम बांधव, ओबीसी बहुजन पक्षाच्या पाठीमागे उभा टाकेल असा विश्वास यावेळी लोकसभेचे उमेदवार भोसीकर यांनी व्यक्त केला आहे.

कोणाला फटका बसणार?

ओबीसी बहुजन पक्षाने लोकसभेच्या निवडणुक लढण्याचा निर्णय घेतला आहे. त्यातच पक्षाकडून उमेदवाराची घोषणा देखील केली जात आहे. पक्षाच्या या निर्णयाने भाजप उमेदवाराला फटका बसणार अशी शक्यता आहे. तर दुसरीकडे ओबीसी पक्ष वंचितसोबत निवडणूक लढल्यास याचा दगा फटका काँग्रेसला बसणार हे नक्की आहे.

लोकसभा निवडणुकीची घोषणा झाली आहे. भाजपने नांदेड लोकसभेसाठी प्रताप पाटील चिखलीकर यांना दुसऱ्यांदा संधी दिली आहे. पण काँग्रेसने मात्र अद्याप ही उमेदवाराची घोषणा केली नाही. नांदेडमध्ये काँग्रेसकडून माजी आमदार वसंत चव्हाण हे इच्छुक आहेत. पक्षश्रेष्ठी माझ्या नावाला पसंती दिल्याचे स्वतः वसंत चव्हाण सांगितले आहे. पण अद्याप ही उमेदवाराबाबत काँग्रेसने कोणतीच भूमिका स्पष्ट केली नाही.