छत्रपती संभाजीनगर : सचिन नरोडे या तरुण व्यावसायिकाची नाशिक महामार्गावर असलेल्या ए.एस कल्ब जवळील खवड्या डोंगर परिसरात डोक्यात गोळी मारून हत्या करण्यात आली. या प्रकरणी वाळूज एमआयडीसी पोलीस ठाण्यामध्ये अज्ञात व्यक्तीविरुद्ध गुन्हा दाखल करण्यात आला आहे.सचिन साहेबराव नरोडे (वय ३५, रा. सिल्लेगाव ता. गंगापूर ह.मु.क्रांतीनगर, साजापुर) असं खून झालेल्या व्यावसायिकाचं नाव आहे. सचिन हे मूळचे गंगापूर येथील रहिवासी असून सध्या ते शहरात राहत होते. शहरात ते वाहनांच्या स्पेअर पार्ट्स विक्रीचा व्यवसाय करत होते. काही दिवसांपासून ते वाळू विक्री आणि जमीन खरेदी विक्रीचा व्यवसाय करत होते. दरम्यान, खवड्या डोंगर परिसरामध्ये क्रांतीनगर परिसरात सचिन हे फोनवर बोलत असताना त्यांना काही नागरिकांनी बघितले होते. मात्र, काही वेळातच त्या ठिकाणाहून बंदुकीचा आवाज नागरिकांना आला.
जेलची भीती, राहुल गांधी म्हणाले ‘एक’ काँग्रेस नेता सोनियांसमोर रडला, अशोक चव्हाण म्हणतात…

या भागामध्ये वीज पुरवठा बंद असल्या कारणाने महावितरणाची विद्युत पुरवठा करणारी डीपी फुटली असावी, असा अंदाज वर्तवत नागरिकांनी दुर्लक्ष केलं. मात्र, काही वेळाने नागरिकांना रक्ताच्या थारोळ्यात पडलेला एक मृतदेह दिसला त्यांनी या घटनेची माहिती तात्काळ वाळूज एमआयडीसी पोलिसांना दिली. घटनेची माहिती मिळताच वाळूज पोलीस ठाण्याचे निरीक्षक कृष्णा शिंदे आणि काही अधिकाऱ्यांनी घटनास्थळी धाव घेतली. रक्ताच्या थारोळ्यात पडलेल्या सचिन यांना त्या परिसरातील घाटी रुग्णालयात दाखल केले असून डॉक्टरांनी त्याची तपासणी केली असल्याची माहिती समोर आली आहे.

सचिन नरोडे यांना काही दिवसांपूर्वी जिवे मारण्याचा प्रयत्न करण्यात आला होता, अशी माहिती कुटुंबीयांनी दिली. व्यावसायिक सचिन यांची हत्या कोणी केली त्याचं कारण अद्याप समजू शकलं नसलं तरी पोलीस या प्रकरणाचा कसून तपास करत आहेत.