मुंबई : काँग्रेस नेते राहुल गांधी यांच्या भारत जोडो न्याय यात्रेचा आज मुंबईत समारोप होत आहे. या यात्रेच्या समारोपाच्या निमित्ताने मुंबईत छत्रपती शिवाजी महाराज पार्क मैदानात आज इंडिया आघाडीची आज भव्य सभा आयोजित करण्यात आलीय. या सभेला देशभरातील इंडिया आघाडीचे दिग्गज नेते उपस्थित आहेत. या सभेत उद्धव ठाकरेंनी भाजप सरकारवर आणि मोदींवर जोरदार निशाणा साधला. भाजप हा एक फुगा आहे. पण वाईट एका गोष्टीचं वाटतं, या फुग्यामध्ये हवा भरण्याचं काम आम्ही केलं होतं. ती हवा आता त्यांच्या डोक्यामध्ये गेली, असं म्हणत ठाकरेंनी भाजपवर टीका केली आहे.
आम्हाला विचारतात तुमचे किती उमेदवार निवडतील. आम्ही त्यांना विचारलं तर ते म्हणतात ४००च्या पार. काय फर्निचरचं दुकान आहे का? खुर्च्या बनवताय का? असं म्हणत ठाकरेंनी भाजपची खिल्ली उडवली. आज देशभरातून आणि सगळ्या राज्यातून महत्त्वाचे नेते येथे आलेत. आपल्याला वाटत असेल की, ही परिस्थिती केवळ महाराष्ट्रात आहे. पण तसं नाहीय केरळ ते काश्मिरपर्यंत हीच परिस्थिती आहे.
जेव्हा मोदीजी तुम्ही आमच्या घराणेशाहीवरती आरोप करतात. तेव्हा तुमचं घराणं मी प्रकाशजींच्या भाषेत बोलत नाही. तुमच्या परिवारामध्ये फक्त तुम्ही आणि तुमची खुर्ची एवढंच आहे, असं म्हणत ठाकरेंनी मोदींवर घणाघात केलाय. आपण ही लढाई लढतोय ती फक्त लोकशाही वाचवण्याची आणि संविधान वाचवण्याची, असं म्हणत उद्धव ठाकरेंनी जनतेला साद घातली आहे.
दरम्यान, वंचित बहुजन आघाडीचे प्रमुख नेते प्रकाश आंबेडकर यांनी भाजपच्या ‘मोदी की परिवार’वरून पंतप्रधान नरेंद्र मोदींवर निशाणा साधला आहे. ते म्हणाले की, आपल्याला लढलं पाहिजे. सोबत लढू किंवा एकटे लढू पण लढलं पाहिजे. मी देशभरातील परिस्थिती सांगत आहे. कारण बंगालमध्ये वेगळी परिस्थिती आहे. महाराष्ट्रात एकत्र लढण्याचा प्रयत्न सुरू आहे. पण दोन गोष्टी आहेत. त्या मोठी आहेत, हे मला वाटतं. इलेक्ट्रॉल बाँड आलं आहे. प्रत्येक चॅनलवर अमित शाह यांची प्रतिक्रिया आली आहे. आम्ही काळापैसा पळवून लावला आहे, असं अमित शाह म्हणत आहे.