म. टा. प्रतिनिधी, नागपूर : मद्यधुंद बहिणींनी रामनगरमधील सायक्लॉन पबमध्ये राडा घातला. बीअरची बाटली फेकून मारल्याने महिला बाउन्सरसह दोघे जखमी झाले. याप्रकरणी अंबाझरी पोलिसांनी दोन तरुणींसह तिघांविरुद्ध शिवीगाळ, मारहाणीसह विविध कलमान्वये गुन्हा दाखल केला.
काय घडलं?
शुभम संजय सिंग (वय ३०), सिमरन (वय ३०) व तिची बहीण तानिया (वय २८, सर्व रा. दिल्ली) अशी गुन्हा दाखल करण्यात आलेल्यांची नावे आहेत. ३५वर्षीय महिला बाउन्सरच्या तक्रारीवरून हा गुन्हा दाखल करण्यात आला.
शनिवारी मध्यरात्री शुभम, सिमरन व तिची बहीण तानिया हे पबमध्ये आले. तिघांनी दारू प्यायली. त्यानंतर शुभम व सिमरनमध्ये वाद झाला. सिमरनने दारूची बाटली शुभमच्या दिशेने फेकली. ही बाटली आधी महिला बाउन्सरला व नंतर महेश नावाच्या बाउन्सरच्या डोक्याला लागली. अन्य एका महिला बाउन्सरनने सिमरनला बाहेर काढण्याचा प्रयत्न केला असता तानियाने तिला शिवीगाळ केली. या घटनेने पबमध्ये तणाव निर्माण झाला. घटनेची माहिती मिळताच अंबाझरी पोलिसांचा ताफा तेथे पोहोचला. पोलिसांनी गुन्हा दाखल करून तिघांना चौकशीसाठी ताब्यात घेतले.
पुण्यात नोकरीचे आमिष दाखवून ४० तरुणांना गंडा, ‘कमांड’मधील सेवानिवृत्त क्लार्कला अटक
पबमधील वाद थांबता थांबेना
गेल्या काही दिवसांपासून उपराजधानीतील पबमधील वाद वाढत आहेत. उशिरा रात्रीपर्यंत हे पब सुरू असल्याने येथे गुंड प्रवृत्तीचे युवक वाद घालत आहेत. वर्धा मार्गावरील डाबो पब अशाच वादासाठी कुख्यात आहे. डाबोसह मेडिकल चौकातील व्हीआर मॉलमधील एजंट जॅक व वेअरहाउस या दोन पबमध्ये तरुणींची छेड काढण्यावरून हाणामारी झाली होती. पबमध्ये वाद झाल्यास परवाना रद्द करण्याचा इशारा पोलिसांनी दिला. आता पोलिस काय कारवाई करतात, याकडे लक्ष लागले आहे.