नांदेड: ज्या मातेने मुलाला जग दाखवले, त्याचा सांभाळ केला, त्याला मोठे केले, त्याच आईच्या डोक्यात दगड घालून निर्दयी मुलाने तिचा खून केला. हिमायतनगर तालुक्यातील पोटा बुद्रुक येथील ही घटना आहे. मुलाने आईची हत्या का केली? याचं कारण मात्र समजू शकले नाही. अनिता दत्ता जळपते (४६) असं मयत महिलेचे नाव आहे. पोटच्या मुलाने आईची हत्या केल्याने एकच खळबळ उडाली आहे.
हत्येच्या घटनेनं पुन्हा नाशिकात खळबळ, रागात तरुणानं माजी सैनिकाला संपवलं, धक्कादायक कारण समोर
मिळालेल्या माहितीनुसार, अनिता जलपते ह्या हिमायतनगर तालुक्यातील पोटा बुद्रुक येथील रहिवासी आहे. रविवारी दुपारी त्या आपल्या मोठ्या मुलासोबत शेतात गेल्या होत्या. मात्र सायंकाळी उशिरापर्यंत अनिता घरी परतली नाही. पत्नी घरी परत न आल्याने पती दत्ता जळपते याने शेतात जाऊन शोध घेतला. यावेळी अनिता ह्या रक्ताच्या थारोळ्यात मृत अवस्थेत आढळून आल्या. हत्या झाल्याची बातमी पसरताच गावकऱ्यांनी मोठी गर्दी केली होती. घटनेची माहिती मिळताच हिमायतनगर पोलिसांनी घटनास्थळी धाव घेऊन पंचनामा केला. मयत महिलेचा मुलगा सचिन उर्फ गजानन यानेचं आईची हत्या केल्या संशय व्यक्त केला जात होता.

याबाबत महिलेचा भाऊ मारुती चिंतलवाड याने तशी तक्रार देखील दाखल केली होती. यापूर्वी देखील त्याने आपल्या आईला मारहाण करायचा. या तक्रारीनंतर पोलिसांनी मुलाला ताब्यात घेतले. खाकी वर्दीचा हिसका दाखवताच मुलाने खुनाची कबुली दिली. शेतात काम करत असताना वाद झाला आणि या वादातून निर्दयी मुलाने आपल्या आईच्या डोक्यात दगड घालून खून केला. पोलीस निरीक्षक जऱ्हाडे यांच्या मार्गदर्शनाखाली सहायक पोलीस निरीक्षक मदय हे या प्रकरणाचा तपास करत आहेत. दरम्यान पोटच्या मुलाने आपल्या जन्मदात्या आईचा निर्घृणपणे खून केल्याने हळहळ व्यक्त होतं आहे.