बीड: परळी रेल्वे स्टेशनजवळ असलेल्या पटरीवरच रेल्वेखाली येऊन पुणे येथे सीआयडी विभागात कार्यरत असलेल्या पोलीस निरीक्षकाने स्वतःचे जीवन संपवल्याची धक्कादायक घटना घडली आहे. सुभाष दुधाळ (४१) असं आत्महत्या केलेल्या पोलीस निरीक्षकाचे नाव आहे. काही महिन्यांपूर्वीच दुधाळ यांची बीड येथून पुणे येथील सीआयडी विभागात बदली झाली होती.
त्याने मागे वळून बघितलं अन् कार येऊन धडकली, लातुरात हॉटेलमध्ये भरधाव कार घुसली, धडकी भरवणारा VIDEO
परळी रेल्वे स्टेशन मास्तर यांनी आज सकाळी सहा वाजेच्या सुमारास रेल्वे पोलीस स्टेशनमध्ये रेल्वेगाडीखाली एका व्यक्तीचे दोन तुकडे झालेला मृतदेह आढळून आल्याची माहिती पोलिसांना दिली. यावरून सहाय्यक पोलीस निरीक्षक परमेश्वर सोगे, पोलीस उपनिरीक्षक साबळे, जमादार बाबासाहेब फड, राजू राठोड, सातपुते व इतर कर्मचाऱ्यांनी घटनास्थळी भेट देऊन पंचनामा करून मृतदेह शवविच्छेदन करण्यासाठी परळी उपजिल्हा रुग्णालयात हलविण्यात आला आहे. मृतदेहाजवळ चिठ्ठी सापडली असून कौटुंबिक कारणातून दुधाळ यांनी आपले जीवन संपवल्याची चर्चा आहे. दरम्यान पोलीस तपासातून आत्महत्या की घातपात हे समोर येणार आहे.

मिळालेल्या माहितीनुसार, सुभाष दुधाळ सांगली येथील रहिवासी होते. अतिशय प्रतिकूल परिस्थितीतून सांगली मधील महात्मा गांधी वसतिगृहात शिक्षण घेतले होते. एमपीएससी २००९-१० मध्ये निवड झाल्याची माहिती दुधाळ यांच्या मित्राने दिली आहे. त्यांचे आई वडील हे शेतकरी होते. त्यांच्या पश्चात आई, वडील, पत्नी, एक मुलगा-मुलगी तसेच भावाची पत्नी आणि मुले असा परिवार आहे. मात्र या घटनेमुळे पोलीस दलासह जिल्ह्यात खळबळ उडाली आहे. घरातील वादांमुळे हे आत्महत्या केली असावी, असा अंदाज वर्तवण्यात आला आहे. त्यांच्याजवळ सापडलेल्या चिठ्ठीमध्ये नेमकं काय मजकूर आहे, त्यानुसार आता पोलीस प्रशासन कशा पद्धतीने पुढील तपास करणार हे देखील पाहणे गरजेचे आहे. मात्र या घटनेनंतर सर्वत्र हळहळ व्यक्त केली जात आहे.