निलेश पाटील, जळगाव: अमेरिकेतील बँकिंग क्षेत्र अस्थिर झाल्याने आंतरराष्ट्रीय पातळीवर सोन्याच्या भावात वाढ झालीये. गेल्या ४८ तासात सोन्याच्या दरात दोन हजार रुपयांची वाढ झाली आहे. सुवर्णनगरी म्हणून ओळख असलेल्या जळगाव शहरातील सराफ बाजारांमध्ये आज कमी प्रमाणात सोने खरेदी करण्यात आली. याला कारण म्हणजे आंतरराष्ट्रीय बाजारपेठेत अमेरिकेतील बँकिंग क्षेत्र अस्थिर झाल्याने सोन्याने सर्वात मोठी उच्चांकी गाठली.
ऐन लग्न सराईची धुमधाम सुरू असल्याने सोन्याची खरेदी वाढली आहे. पण, सोन्याच्या जरात वाढ झाल्याने अनेकांचे बजेट गडबडले. त्यामुळे सर्वसामान्यांना सोनं घेणं कठीण झालं आहे. सोन्याचा दर वाढल्याने आज बाजारपेठेत सोनं खरेदीही कमी झाली.
आंतरराष्ट्रीय पातळीवरील सोन्याच्या भावात वाढ होऊन एकाच दिवसात सोने ८५० रुपयांनी ओझरले. यामुळे जळगावात सोन्याचे भाव उच्चांकी पातळीवर पोहोचले. जळगावात आज सोन्याचा दर ६४ हजार ६५० रुपये अधिक जीएसटी पकडून ६६ हजारावर पोहोचला. तसेच, जळगावात चांदीच्या भावात ७०० रुपयांची घसरण होऊन दर ७२ हजार ८०० रुपये प्रति किलो वर आले. २ मार्चपासून सोन्याच्या भावात वाढ सुरू झाली. २ मार्च रोजी ६५० रुपयांची वाढ होऊन सोने ६३ हजार ७५० वर पोहोचले होते.
भाव वाढ कशामुळे?
अमेरिकेतील दोन मोठ्या बँकांचे आर्थिक स्थिती बिघडली आहे, जर ती सुधारली नाही तर येत्या आठ ते दहा दिवसात सोन्याचा भाव दोन ते तीन हजार रुपयांनी वाढेल, असा अंदाज सराफ व्यापाऱ्यांनी व्यक्त केला आहे.
“गेल्या ४८ तासात सोन्याचे भाव दोन हजाराने वाढले असून ६६ हजारांच्या जवळपास सोन्याचे भाव पोहोचला आहे. सोन्यामधील गुंतवणूक अधिक प्रमाणात वाढली असून जागतिकस्तरावर सोन्याचे भाव वाढत आहे. दोन महिन्यांपासून सोन्याचे भाव स्थिर होते अचानक भाव वाढल्याने ग्राहकांमध्ये भीतीचे वातावरण निर्माण झाले. आज ग्राहकांची लगबग कमी दिसून आली. सोनं कधी घ्यावं हा विचार ग्राहक करत आहे. ही आतापर्यंतची सर्वात मोठी भाव वाढ आहे”, अशी माहिती आकाश भंगाळे या सराफा व्यावसायिकाने दिली आहे.