पुणे : बारामती लोकसभा मतदारसंघात सुप्रिया सुळे विरुद्ध सुनेत्रा पवार असा सामना होणार असल्याचं आता जवळपास स्पष्ट झालं आहे. सुप्रिया सुळे आणि सुनेत्रा पवार या दोघींनीही आपल्या प्रचाराला आता सुरुवात केली आहे. सुनेत्रा पवारांसाठी अजित पवार यांनी आपली पूर्ण ताकद पणाला लावली असून अजित दादांचं संपूर्ण कुटुंब सुनेत्रा पवार यांच्या प्रचारासाठी आता मैदानात उतरलं आहे. तर दुसरीकडे स्वतः सुप्रिया सुळे, शरद पवार आणि पवार कुटुंबातील इतर सदस्य हे देखील सुप्रिया सुळेंच्या विजयासाठी जंग जंग पछाडत आहेत.

मात्र सुप्रिया सुळे यांच्या विजयात राष्ट्रवादीच्या फुटीनंतर अनेक अडथळे निर्माण झाले आहेत. बारामतीची निवडणूक ही अगदी सोपी जाणाऱ्या सुप्रिया सुळेंना यंदाची लोकसभा निवडणूक मात्र कठीण जाणार असल्याचे चित्र आहे. आणि यामध्ये सगळ्यात मोठा अडसर हा पुणे जिल्ह्यातील बारामती लोकसभा मतदारसंघात येणारा खडकवासला विधानसभा मतदारसंघ हा आहे.

2014 आणि 2019 च्या लोकसभा निवडणुकीमध्ये सुप्रिया सुळे यांना या विधानसभा मतदारसंघात मोठ्या पिछाडीवर राहावं लागलं होतं. 2014 मध्ये बारामती लोकसभा मतदारसंघाच्या निवडणुकीत सुप्रिया सुळे यांचा सामना राष्ट्रीय समाज पक्षाचे आणि तत्कालीन महायुतीचे उमेदवार महादेव जानकर यांच्यासोबत झाला होता. या निवडणुकीत सुप्रिया सुळे यांचा विजय झाला होता मात्र, त्यांना खडकवासला विधानसभा मतदारसंघात आघाडी काही घेता आली नव्हती.
एक मुख्यमंत्री आलाय, समजून जा; रत्नागिरीसाठी No Compromise, कमळच फुलणार, प्रमोद सावंत आक्रमक
या निवडणुकीत सुप्रिया सुळे यांना खडकवासल्यातून 70 हजार 602 इतकी मतं मिळाली होती तर महादेव जानकर यांना 98 हजार 729 इतकी मतं मिळाली होती. त्यानंतर झालेल्या 2019 च्या लोकसभा निवडणुकीत बारामती लोकसभा मतदारसंघात सुप्रिया सुळे विरुद्ध भाजपच्या कांचन कुल यांच्यात सरळ लढत झाली होती. या निवडणुकीत देखील सुप्रिया सुळे या खडकवासला मतदारसंघात पिछाडीवरच होत्या. या निवडणुकीत सुप्रिया सुळे यांना इथून 85 हजार 993 इतकी मते मिळाली होती तर कांचन कुल यांना 1 लाख 52 हजार 487 इतकी मतं मिळाली होती.
शिरुरमधून भाजप आमदाराला तिकीट द्या, अजितदादा गटातील इच्छुकाची जबरी खेळी, आढळरावविरोध सुरुच
या दोन्ही निवडणुकांमध्ये राष्ट्रवादी एकसंध होती अजित पवार यांची ताकद सुप्रिया सुळे यांच्या पाठीमागे होती तरी देखील खडकवासला मतदारसंघातून सुप्रिया सुळे यांना लीड मिळाले नव्हते. आता बारामती लोकसभा मतदारसंघासह खडकवासल्याचे गणित देखील बदलले आहेत. या मतदार संघातील राष्ट्रवादी काँग्रेसच्या प्रमुख नेत्यांपैकी सुप्रिया सुळे यांच्याकडे सचिन दोडके, नवनाथ पारगे, काकासाहेब चव्हाण, विशाल तांबे हे नेते आहेत. तर अजित पवारांसोबत रुपाली चाकणकर, दत्ता धनकवडे, युवराज बेलदरे, वैभव मते हे नेते आहेत. त्यामुळे येथे देखील अजित पवार यांची सरशी पाहायला मिळत आहे.

दुसरीकडे खडकवासला मतदारसंघाची भौगोलिक रचना पाहायला गेलं तर या मतदारसंघाचा 70 टक्के भाग हा शहरी असून 30 टक्के भाग हा ग्रामीण आहे. त्यामुळे या मतदारसंघावर भाजपचा जास्त प्रभाव आहे. त्यामुळेच मनसेचे सोनेरी आमदार रमेश वांजळे यांच्या निधनानंतर झालेल्या पोटनिवडणुकीत भाजपच्या भीमराव तापकीर यांनी विजय मिळवला होता. पुढे 2014 आणि 2019 साली झालेल्या विधानसभा निवडणुकीत देखील भीमराव तापकीर यांनीच विजय मिळवला होता. 2019 च्या निवडणुकीमध्ये राष्ट्रवादी काँग्रेसचे सचिन दोडके यांचा निसटता पराभव झाला होता. त्यावेळी सचिन दोडके यांच्या पराभवाला राष्ट्रवादी मधील गटबाजी कारणीभूत असल्याचं बोललं गेलं होतं. त्यामुळे या मतदारसंघात राष्ट्रवादीची ताकद आहे. तर आता अजित पवार यांच्यासोबत भाजपची ताकद देखील मिळाल्याने सुनेत्रा पवार यांना या मतदार संघात मोठे मताधिक्य मिळण्याची शक्यता आहे.
Read Latest Maharashtra News Updates And Marathi News

त्यामुळे राज्यात हायव्होल्टेज समजली जाणारी बारामती लोकसभा मतदारसंघाची निवडणूक आणि त्यात विजयी होणाऱ्या उमेदवाराचे भवितव्य हे खडकवासला विधानसभा मतदारसंघाच्या गणितांवर अवलंबून आहे. त्यात महाविकास आघाडीमध्ये असणाऱ्या शिवसेना उद्धव बाळासाहेब ठाकरे या पक्षाची कमी झालेली ताकद याचा देखील फटका सुप्रिया सुळे यांना बसू शकतो. याउलट भाजपची असणारी मोठी ताकद याचा फायदा हा सुनेत्रा पवार यांना होणार आहे. त्यामुळे आता राष्ट्रवादी काँग्रेसने फक्त एकट्या खडकवासला विधानसभा मतदारसंघातून एक ते दीड लाख लीड मिळवण्याचं प्लॅनिंग केल आहे. त्यामुळे बारामतीचा खासदार कोण असणार त्याचा मुख्य रस्ता हा खडकवासला मतदारसंघातूनच जाणार हे जवळपास निश्चित आहे.