म.टा. प्रतिनिधी, नागपूर: गांधीबाग येथून १ लाख ५१ हजार ८६० रुपये किमतीचे सिगारेट कार्टनचे बॉक्स चोरणाऱ्या आरोपीला सीसीटीव्ही कॅमेऱ्याच्या मदतीने अटक करण्यात आली. आरोपीच्या राहत्या घरून ४७ नग सिगारेटचे बॉक्स जप्त करण्यात आले.सिंधी कॉलनी, खामला येथील रेवाचंद परसबानी यांचे आनंद टॉकीजजवळ किराणा दुकान आहे. परसबानी यांनी २६ फेब्रुवारी रोजी गांधीबाग येथून एम.एल.डी. क्लोव्ह सि. मीक्स मॅक्स या कंपनीच्या सिगारेटचे कार्टन बॉक्स खरेदी केले. दुकानात गर्दी असल्याने त्यांनी हा साठा बाहेरच ठेवला. या काळात नजर चुकवून एका चोरट्याने हा बॉक्स पळविला.
पोलिसांनी तपास करून गोंदिया जिल्ह्यातील आमगाव येथील अरुण डोये (वय ३६ वर्षे) या चोरट्याला ताब्यात घेतले. चौकशी केल्यानंतर त्याने आपला गुन्हा कबूल केला. गुन्हेशाखा युनिट क्रमांक २चे साहाय्यक पोलिस निरीक्षक गजानन चांभारे, प्रवीण सोनोने, पोलिस उपनिरीक्षक मनोज राऊत, नरेश तुमडाम, कमलेश गणेर, गजानन कुबडे आदींच्या पथकाने ही कारवाई केली.