म. टा. प्रतिनिधी, छत्रपती संभाजीनगर : करुणा अशोक शर्मा उर्फ करुणा धनंजय मुंडे यांच्या विरोधातील ॲट्रासिटीचा गुन्हा रद्दबातल करण्याचे आदेश मुंबई उच्च न्यायालयाच्या औरंगाबाद खंडपीठाचे न्या. मंगेश पाटील, न्या. शैलेश ब्रम्हे यांनी दिले आहेत.
करुणा अशोक शर्मा उर्फ करुणा धनंजय मुंडे या पाच सप्टेंबर २०२१ रोजी परळी शहरात मंत्री धनंजय मुंडे यांच्याबद्दल पत्रकार परिषद घेण्यासाठी आल्या होत्या. त्या परळी वैजनाथ मंदिरात आल्या असता फिर्यादीने त्यांच्यासह इतरांना जातीवाचक शिवीगाळ केली. करुणा यांनीही धनंजय मुंडे व त्यांची पत्नी यांना शिवीगाळ केली. जाब विचारल्याने करुणा मुंडे यांच्याबरोबर असलेली व्यक्ती अरुण दत्तात्रय मोरे यांनी फिर्यादी व इतरांना धक्काबुक्की करून जातीवाचक शिवीगाळ केली म्हणून परळी शहर पोलिस ठाण्यात करुणा मुंडे आणि अरुण मोरे यांच्याविरुद्ध ॲट्रासिटीचा गुन्हा दाखल करुन पोलिसांनी दोघांनाही अटक केली होती. या प्रकरणात पोलिसांनी तपास करून आंबेजोगाई न्यायालयात दोषारोपपत्र दाखल केले. करुणा शर्मा यांनी हा गुन्हा रद्द करण्यासाठी खंडपीठात ॲड. संदीप आंधळे यांच्यामार्फत फौजदारी अर्ज दाखल केला.
या प्रकरणात आरोपी करुणा शर्मा पहिल्यांदाच परळीत आल्या. फिर्यादीनेही करुणा शर्मा उर्फ मुंडे यांना ओळखत नसल्याचे सांगितले. फिर्यादीची जात आणि धर्म आरोपीला माहित असलेला कोणताही पुरावा नाही. हा गुन्हा राजकीय हेतूने एका मंत्र्याच्या सांगण्यावरून दाखल केला. दुसरा आरोपी प्रकरण दाखल झाल्यानंतर काही दिवसातच मयत झाला असल्यामुळे गुन्हा सिद्ध होत नाही, असा युक्तिवाद करण्यात आला.
नवऱ्याला संसदेत अलाऊड नसतं, कॅन्टिनमध्ये पर्स सांभाळत बसावं लागतं, सुप्रिया सुळेंची अजित पवारांवर खोचक टीका
आरोपी करुणा शर्मा यांना अटक केल्यानंतर पोलिसानी त्यांच्या सांताक्रुज (मुंबई) येथील फ्लॅटची घरझडती घेत त्यांचा लॅपटॉप व इतर साहित्य जप्त केले. जर गुन्हा परळीत घडला तर आरोपींच्या मुंबई घरी लॅपटॉप मोबाईल व साहित्य जप्त करण्याचे कारण नाही. पोलिसांनी खोटा तपास केल्यामुळे हा गुन्हा रद्द करण्याची ॲड. आंधळे यांची विनंती खंडपीठाने मान्य केली. त्यानुसार वरील आदेश देण्यात आला आहे.