म. टा. खास प्रतिनिधी, मुंबई: पत्नीवरील राग काढण्यासाठी एका व्यावसायिकाने दारूच्या नशेत चक्क घरातच स्वैर गोळीबार केल्याची घटना उत्तर मुंबईतील दिंडोशी परिसरात घडली. गोळीबार करताना या व्यावसायिकाने पत्नी आणि मुलाला घराबाहेर ठेवून घराची नासधूस केली. पोलिसांनी परवानाधारक रिव्हॉल्वरचा गैरवापर केल्याप्रकरणी राजीव रंजन या व्यावसायिकाविरुद्ध गुन्हा दाखल केला आहे.
गोरेगाव पूर्वेकडील गोकुळधाम परिसरातील डी. बी. वूड्स सीएचएसमध्ये गोळीबार सुरू असल्याची माहिती एका महिलेने रविवारी सायंकाळी पोलिसांच्या नियंत्रण कक्षामध्ये फोन करून दिली. यानंतर दिंडोशी पोलिस घटनास्थळी दाखल झाले. तेथे एक महिला आणि तिचा मुलगा घराबाहेर उभे राहून दरवाजा ठोठावत होते आणि घरातून गोळ्यांचे आवाज येत होते. आजूबाजूच्या नागरिकांनी या ठिकाणी गर्दी केली होती. पोलिसांनी या महिलेकडून माहिती घेतली असता पती राजीव हे घरामध्ये असून गोळीबार करीत असल्याचे तिने सांगितले.
पोलिसांनी राजीव याला दरवाजा उघडण्यासाठी विनंती केली, मात्र तो काही ऐकण्याच्या स्थितीत नव्हता. बराच वेळ विनवणी केल्यानंतर राजीव याने दरवाजा उघडला. आतमध्ये सगळीकडे काचा पडल्या होत्या. राजीवने दरवाजा, डायनिंग टेबल अशा समोर दिसेल त्या वस्तूंवर गोळ्या झाडल्या होत्या. पोलिसांनी संपूर्ण घराची झडती घेतली असता दोन रिव्हॉल्वर सापडल्या. एक राजीव, तर दुसऱ्या रिव्हॉल्वरचा परवाना पत्नीच्या नावावर असल्याचे दिसून आले.
पोलिसांनी या दोन्ही रिव्हॉल्वर, काही काडतुसे, रिकामी पुंगळ्या आणि परवाना नसलेल्या बंदुकीची काही काडतुसे हस्तगत केली. परवाना असलेली शस्त्रे बेजबाबदार आणि निष्काळजीने हाताळून इतरांच्या जीवितास धोका निर्माण करणाऱ्या राजीव याच्यावर दिंडोशी पोलिस ठाण्यात गुन्हा दाखल करण्यात आला आहे.