पुणे: फळभाज्यांची आवक कमी-जास्त होत असल्याने भेंडी, गवार, फ्लॉवर, कोबी, वांगी आणि शिमला मिरचीच्या दरात वाढ झाली आहे. इतर फळभाज्यांचे दर स्थिर असल्याची माहिती व्यापाऱ्यांनी दिली. पुणे बाजार समितीच्या छत्रपती शिवाजी मार्केट यार्डात रविवारी फळभाज्यांची मोठ्या प्रमाणात आवक झाली.गुलटेकडीतील मार्केट यार्डात राज्यातून आणि परराज्यांतून सुमारे १०० ते ११० ट्रक फळभाज्यांची आवक झाली. कर्नाटक, गुजरात, आंध्र प्रदेश येथून हिरवी मिरची सुमारे आठ ते १० टेम्पो, कर्नाटक, गुजरातमधून कोबी चार ते पाच टेम्पो, आंध्र प्रदेश, तमिळनाडूतून शेवगा पाच ते सहा टेम्पो, राजस्थानातून गाजर नऊ ते १० टेम्पो, कर्नाटकातून घेवडा चार ते पाच टेम्पो, भुईमुगाच्या शेंगा दोन टेम्पो, मध्य प्रदेश, राजस्थान येथून मटार नऊ ते १० ट्रक, कर्नाटक येथून पावटा चार ते पाच टेम्पो, मध्य प्रदेशातून लसणाच्या १३ ते १४ टेम्पोंची आवक झाली.
शाळेच्या आवारात मुलाचा अभ्यास, शिक्षणमंत्र्यांच्या जिल्ह्यात शिक्षणाचा खेळखंडोबा, विद्यार्थी न्यायाच्या प्रतिक्षेत
‘स्थानिक भागातून सातारी आल्याच्या ६०० ते ७०० गोण्या, भेंडी सहा ते सात टेम्पो, गवार सहा ते सात टेम्पो, टोमॅटो दहा ते अकरा हजार क्रेट, हिरवी मिरची चार ते पाच टेम्पो, काकडी सात ते आठ टेम्पो, फ्लॉवर १० ते १२ टेम्पो, कोबी चार ते पाच टेम्पो, शिमला मिरची दहा टेम्पो, पावटा चार ते पाच टेम्पो, तांबडा भोपळा १५ टेम्पो, शेवगा तीन टेम्पो, घेवडा पाच ते सहा टेम्पो, कांदा १०० ट्रक, इंदूर, आग्रा आणि स्थानिक भागांतून बटाट्याची ४० टेम्पोंची आवक झाली,’अशी माहिती ज्येष्ठ आडते विलास भुजबळ यांनी दिली.

पालेभाज्यांची आवक कमी
उन्हाचा चटका जाणवू लागताच पालेभाज्यांची आवक कमी झाली असून, या भाज्यांचे दरही वाढले आहेत. मेथी, शेपू, कांदापात, करडई, पुदिना, अंबाडी, राजगिरा, चुका, चवळई आणि हरभरागड्डीच्या दरात वाढ झाली असून, कोथिंबिर, चाकवत, मुळा आणि पालकचे भाव स्थिर असल्याची माहिती व्यापाऱ्यांनी दिली. कोथिंबिरीची दीड लाख जुडी आणि मेथीची ७० हजार जुडींची आवक झाली. पालेभाज्यांचे शेकड्यातील दर : कोथिंबीर १०००-१५००, मेथी ६००-१०००, शेपू ८००-१०००, कांदापात ८००-१२००, चाकवत ४००-७००, करडई ३००- ७००, पुदिना ३००-८००, अंबाडी ४००-७००, मुळा ६००-१०००, राजगिरा ४००-७००, चुका ६००-१०००, चवळई ३००-७००, पालक ८००-१५००, हरभरा गड्डी ८००-१५००.

फळबाजारात खरबुजाच्या दरात वाढ झाली असून, लिंबांच्या दरात घट झाली आहे. अननस, चिकू, पेरू, पपई, डाळिंब, संत्री, मोसंबी आणि सफरचंदाचे दर स्थिर असल्याची माहिती व्यापाऱ्यांनी दिली़ केरळ येथून अननस सात ट्रक, मोसंबी २० ते ३० टन, संत्री ४० ते ५० टन, डाळिंब २५ ते ३० टन, पपई २० ते २५ टेम्पो, लिंबांच्या सुमारे एक हजार ते दीड हजार गोणी, कलिंगड २० ते २५ टेम्पो, खरबूज १० ते १२ टेम्पो, चिकू दोन हजार बॉक्स, सफरचंद ८०० ते एक हजार बॉक्स अशी आवक झाली.

फुलांच्या दरात घसरण
फुलबाजारात फुलांची रविवारी मोठ्या प्रमाणात आवक झाली. मागणी कमी असल्याने फुलांच्या दरात दहा टक्क्यांनी घसरण झाली. शोभिवंत फुलांचे दर टिकून आहेत. फुलांचे प्रतिकिलोचे दर पुढीलप्रमाणे : झेंडू ३०-५०, गुलछडी १५०-१७०, अ‍ॅस्टर जुडी १०-१४, ५०-८०, कापरी ३०-६०, शेवंती ५०-८०. (गड्डीचे भाव) गुलाबगड्डी १०-२०, गुलछडी काडी ३०-८०, डच गुलाब (२० नग) १८०-२५०, जर्बेरा ३०-६०, कार्नेशियन ६०-१५०, शेवंती काडी १५०-२५०, लिलियम (१० काड्या) ८००-१०००, ऑर्किड ४००-५००, ग्लॅडिओ (१० काड्या) ८०-१२०, जिप्सोफिला २००-२५० रुपये.

मासळीचे दर तेजीत
गणेश पेठ येथील मासळी बाजारात मासळीला मागणी जास्त असल्याने सर्व प्रकारच्या मासळीचे दर तेजीत आहेत. चिकनच्याही दरात वाढ झाली आहे. इंग्लिश अंड्यांच्या मागणीत घट झाल्याने दरात शेकड्यामागे ३५ रुपयांनी घसरण झाली आहे. गावरान अंडी आणि मटणाचे दर स्थिर आहेत. ‘बाजारात खोल समुद्रातील मासळी १५ टन, खाडीची मासळी २०० ते ३०० किलो आणि नदीच्या मासळीची ७०० किलोची आवक झाली. आंध्र प्रदेश येथून रहू, कतला आणि सिलनचीही सुमारे १५ ते २० टनांची आवक झाली,’ अशी माहिती मासळीचे व्यापारी ठाकूर परदेशी, चिकन-अंड्यांचे व्यापारी रूपेश परदेशी आणि मटणाचे विक्रेते प्रभाकर कांबळे यांनी दिली.