जळगाव : जळगाव लोकसभेचे खासदार उन्मेष पाटील यांच्या उमेदवारीचा पत्ता यंदा भारतीय जनता पक्ष कापण्याच्या तयारीत असल्याच्या चर्चा आहेत. जळगावमधून दुसरा उमेदवार रिंगणात उभा करण्याची भाजपची तयारी सुरू झाली आहे. याचविषयी खासदार उन्मेष पाटील यांना विचारलं असता त्यांनी ‘डिप्लोमॅटिक’ उत्तर दिलं.
जळगाव लोकसभेसाठी कोणी उमेदवार दिला तर मी कार्यकर्ता म्हणून उमेदवाराचे काम करेन. मी पक्षाचा बांधिल कार्यकर्ता असल्याचे मत खासदार उन्मेष पाटील यांनी आज माध्यमांशी बोलताना व्यक्त केले.
जळगाव लोकसभेत भाजपमधील अनेक इच्छुकांची नावे समोर आली असून विद्यमान खासदार उन्मेष पाटील यांचे लोकसभेसाठी तिकीट कापले जाणार असल्याची चर्चा सध्या मतदारसंघात सुरू आहे. खासदार पाटील यांचे तिकीट कापले जाऊन नव्या चेहऱ्याला तिकिट मिळणार अशी चर्चा आहे. या विषयावर खासदार उन्मेष पाटील यांनी सांगितले की, भारतीय जनता पार्टीचे काम बघून अनेक नवीन उमेदवार भाजपकडून उमेदवारी इच्छुक आहे याचाच मला आनंद आहे. जळगाव लोकसभेत कुठलाही उमेदवार असला तरी भाजपचा कार्यकर्ता म्हणून त्याच्यासाठी काम करेल, खासदार आमदार असताना होत असलेल्या विकासाचा साक्षीदार होता आलं याचाही आनंद असल्याचेही यावेळी उन्मेष पाटील म्हणाले.
निंबाळकर की मोहिते पाटील? कोणत्या ‘रणजीतसिंहां’ना साथ? शहाजीबापू म्हणतात, तिकीट कुणालाही मिळो, माझा पाठिंबा…
जळगाव लोकसभेसाठी भाजपकडून अनेक नवीन चेहरे इच्छुक आहेत. गेल्या निवडणुकीत भाजपकडून एबी फॉर्म मिळालेल्या स्मिता वाघ यांची उमेदवारी ऐनवेळेस रद्द करून उन्मेश पाटील यांना उमेदवारी देण्यात आली होती. त्यावेळी रद्द झालेल्या उमेदवारीचं दुःख बाजूला सावरून स्मिता वाघ यांनी पक्षाचे प्रमाणिकपणे काम केले.
उज्वल निकम यांचे पुतणे रोहित निकम हे देखील उमेदवारीसाठी आग्रही असल्याचे दिसत आहे. रोहित निकम यांचे पक्षासाठी कुठलेही योगदान नाही. उज्वल निकम यांचे पुतणे म्हणून त्यांची ओळख जिल्ह्यात आहे. त्यांना आता जिल्हा दूध संघावर संचालक म्हणून घेण्यात आले आहे. मी राष्ट्रीय स्वयंसेवक संघाचा स्वयंसेवक असल्याने मलाच तिकीट मिळेल, असे कधीही सार्वजनिक कार्यक्रमांत न दिसणारे अविनाश पाटील सध्या मतदारसंघात फिरताना बोलत आहेत.