म. टा. खास प्रतिनिधी मुंबई : विवाह जुळविणाऱ्या संकेतस्थळावरून ओळख झाल्यानंतर हैदराबाद येथील तरुणाने मुंबईतील शिक्षिकेला प्रेमाच्या जाळ्यात ओढले. आपल्या मधाळ बोलण्याने या तरुणाने तिला लग्नाचे प्रलोभन दाखवले. या तरुणाने शिक्षिकेकडून वेगवेगळी कारणे सांगून तब्बल २१ लाख रुपये लाटले. फसवणूक झाल्याचे लक्षात येताच या शिक्षिकेने पायधुनी पोलिस ठाण्यात तक्रार केली. पायधुनी येथे वास्तव्यास असलेली सायरा (बदललेले नाव) ही फोर्ट येथील एका खासगी शाळेत शिक्षिका आहे. लग्न जमत नसल्याने तिने एका विवाह जुळविणाऱ्या संकेतस्थळावर नोंदणी केली होती. तिचे प्रोफाइल पाहून इम्रानअली खान नावाच्या तरुणाने सायरा हिला रिक्वेस्ट पाठविली.इम्रानअली हैदराबाद येथे बांधकाम व्यवसाय करीत असून त्याचे दोन भाऊ कॅनडा येथे स्थायिक झाल्याचे त्याच्या प्रोफाइलवरून कळले. दिसायला सुंदर आणि आर्थिक स्थितीही चांगली असल्याने सायरा हिने त्याला प्रतिसाद दिला आणि पसंती असल्याचे कळविले. काही दिवसांनी डोंगरी येथील एका हॉटेलमध्ये इम्रानअली याने सायरा हिला भेटण्यासाठी बोलावले. काही ठिकाणी फिरल्यानंतर तो पुन्हा घरी परतला. लग्न जमले असून पार्टी द्यायची आहे असे सांगून त्याने सायराकडून एक हजार रुपये घेतले. आर्थिक परिस्थिती चांगली असताना इम्रानअली पैसे मागत असल्याने तिला संशय आला. यावर मित्रांना तुझ्या पैशातून पार्टी हवे असल्याचे तो म्हणाला.

लग्न करणार असल्याने दोघेही एकमेकांशी मोकळेपणाने बोलू लागले. पुन्हा एकदा इम्रानअली मुंबईत आला. त्यावेळी त्याने एका महिलेशी सायराची ओळख करून दिली. या महिलेची खोली खरेदी करायची असून दहा लाख आगाऊ दे, असे सांगितले. सायरा हिने एफडी मोडल्या आणि ही रक्कम दिली. त्यानंतर वनजमिनीवर अतिक्रमण केल्यामुळे पोलिसांनी इम्रानअली याला अटक केली असून त्याच्या सुटकेसाठी पैसे हवेत, असे त्याच्या मित्राने कळविले. अशाप्रकारे वेगवेगळी कारणे सांगून इम्रानअली याने सायरा हिच्याकडून रोख आणि ऑनलाइन स्वरूपात २१ लाख ७३ हजार इतकी रक्कम घेतली. सायरा हिला संशय येऊ लागताच इम्रानअली याने संपर्क तोडला. इम्रानअली याने गंडविल्याचे लक्षात येताच सायरा हिने पोलिसांत धाव घेतली.