मुंबई : म्हाडाचे घर मिळविण्यासाठी सर्वसामान्यांकडून सर्वोतोपरी प्रयत्न सुरू असतात. तुलनेने ही घरे स्वस्त असल्याने नागरिकांचा याकडे ओढा असतो. याच मानसिकतेचा गैरफायदा दलाल घेत असून धारावीमध्ये सात ते आठ जणांनी सुमारे दीड कोटी रुपये गमावले. या दलालाने बनावट कागदपत्रे, म्हाडाच्या खोट्या पावत्या दाखवून विश्वास संपादन केला. सर्व नागरिकांनी केलेल्या तक्रारीवरून धारावी पोलिसांनी दलालावर गुन्हा दाखल केला आहे.

काय प्रकरण?

मुंबई अग्निशमन दलातून सन २०२०मध्ये निवृत्त झालेल्या रमाकांत (बदललेले नाव) यांना स्वतःचे घर घ्यायचे होते. फार रक्कम जमा नसल्याने त्यांनी म्हाडाच्या घरासाठी प्रयत्न सुरू केला. यावेळी एका परिचयातील व्यक्तीने जितेंद्र शेलार नावाच्या एजंटसोबत ओळख करून दिली. म्हाडाची घरे स्वस्तात मिळवून देतो म्हणून शेलार याने रमाकांत यांना सांगितले. त्यानुसार रमाकांत यांनी शेलारला १३ लाख रुपये दिले. धारावीच्या एमसीजीएम कॉलनीमधील एक घर त्याने रमाकांत यांना दिले. मात्र अन्य एका व्यक्तीने ही खोली आपली असल्याची तक्रार पोलिस ठाण्यात केली. शेलार याच्या सांगण्यानुसार रमाकांत यांनी ती खोली सोडली. दुसऱ्या घरासाठी रमाकांत याने आणखी १६ लाख रुपये शेलारला दिले. त्यानंतर शेलार याने खोट्या पावती, देकार पत्र तसेच इतर कागदपत्रे दाखवली, मात्र घर काही दिले नाही.
लोकसभा निवडणुकीआधी महायुतीला मिळणार आणखी एक साथीदार; राज ठाकरे भाजप सोबत जाणार? का सुरू झाली ही चर्चा
म्हाडाच्या घराच्या नावाखाली शेलार आपली फसवणूक करीत असल्याचा संशय आल्याने रमाकांत यांनी अधिक माहिती काढली. त्यामध्ये शेलार याने आणखी काही जणांकडून पैसे घेतल्याचे समजले. सात ते आठ जणांकडून शेलार याने जवळपास दीड कोटी रुपये घेतल्याचे समोर आले. आपल्यासोबत इतर सर्वांची फसवणूक झाल्याचे समजताच रमाकांत यांनी धारावी पोलिस ठाण्यात धाव घेतली. धारावी पोलिसांनी शेलार याच्याविरुद्ध फसवणुकीचा गुन्हा दाखल केला आहे.