बुलढाणा: जिल्ह्यातून एक दु:खद घटना समोर आली आहे. लग्न समारंभ आटोपून घरी येत असताना झाडेगावजवळ आल्यानंतर ऑटोला जीपने धडक दिली. या घटनेत पाच वर्षांची मुलगी आणि आईचा मृत्यू झाला आहे. ही घटना १८ फेब्रुवारी रोजी रात्री ९ वाजताच्या दरम्यान घडली आहे.
रायगडावर दोघे फिरण्यास गेले; खाली येताना रस्ता चुकले अन् हिरकणी कड्यावर अडकले, नंतर जे घडलं…
मिळालेल्या माहितीनुसार, बुलढाणा जिल्ह्यातील मानेगाव येथील रहिवासी रुखमा शांताराम रत्नपारखी त्यांची सासू आणि दोन मुलींसह लग्न समारंभाला गेल्या होत्या. परत येताना झाडेगाव जवळ त्यांच्या ऑटोला नांदुऱ्याकडून पिंपळगाव काळेकडे जात असलेल्या जीपने धडक दिली. अपघातात पूर्वी शांताराम रत्नपारखी (५) हिचा मृत्यू झाला आहे. तर तिची आई रुख्मा शांताराम रत्नपारखी (३८) यांना गंभीर अवस्थेत खामगाव येथील रुग्णालयात दाखल करण्यात आले. त्यांचा उपचारादरम्यान मृत्यू झाला.

या अपघातात हिंगणे मानकर येथील रमेश वैतकार यांच्यासह ऑटोचालक जखमी झाले. अपघात झाल्यानंतर जीपचा चालक फरार झाला आहे. पुढील तपास जळगाव जामोद पोलीस करत आहेत. दरम्यान घटनास्थळी झाडेगाव पोलीस पाटील सारंगधर खाळपे आणि श्रीनाथ यांच्यासह मानेगाव, झाडेगाव येथील रहिवाशींनी जखमींना तात्काळ दवाखान्यात उपचारासाठी दाखल केले. लग्न समारंभानंतर घराकडे जाताना मृत्यू आपली वाट पाहत आहे, हे आई आणि मुलीला स्वप्नात देखील कधी वाटलं नसेल. या अचानक घडलेल्या घटनाक्रमामुळे वऱ्हाडी मंडळींमध्ये शोककाळा पसरली आहे. तर दुसरीकडे गावात देखील हळहळ व्यक्त केली जात आहे.