कोल्हापूर : जावयाचा त्रास सासऱ्याला भोगण्याची वेळ आमदार शहाजी बापू पाटील यांच्यावर आली आहे. कोल्हापुरात सुरू असलेल्या शिवसेना शिंदे गटाच्या महाअधिवेशनात प्रवेशद्वारावर लावण्यात आलेल्या सर्व आमदार – खासदार यांच्या बॅनरमधून शहाजी बापू पाटील यांचा फोटो वगळण्यात आला आहे. यामुळे कोल्हापुरात या बॅनरची जोरदार चर्चा सुरू आहे.

काय झाडी.. काय डोंगर…काय हाटेल…सगळं एकदम ओके मध्ये आहे, असं म्हणणारे सांगोल्याचे आमदार शहाजी बापू पाटील हे सध्या जावयाच्या राजकीय संघर्षामुळे नॉट ओके झाले आहेत. शिवसेनेचे सोलापूर जिल्ह्यातील सांगोला तालुक्याचे आमदार शहाजी बापू पाटील हे कोल्हापूरचे ठाकरे गटाचे शहराध्यक्ष रविकिरण इंगवले यांचे सासरे आहेत. म्हणजे सासरा शिंदे गटात आणि जावई ठाकरे गटात असे काही समीकरण या दोघांमध्ये आहे. तर ठाकरे गटाचे रविकिरण इंगवले आणि शिंदे गटाचे राज्य नियोजन मंडळाचे कार्यकारी अध्यक्ष माजी आमदार राजेश क्षीरसागर हे दोघे एकमेकांचे कट्टर विरोधी आहेत.

मी एका बाजूला, सगळं पवार कुटुंब दुसरीकडे; अजितदादांच्या भावनिक आवाहनावर काकांचे खडे बोल

राजेश क्षीरसागर आणि रविकिरण इंगवलेंमधील संघर्ष कायम

शिवसेना एकत्र असताना राजेश क्षीरसागर आणि रविकिरण इंगवले या दोघांमधील दोस्ताना हा शहरातील चर्चेचा विषय होता. मात्र, दोघांनी घेतलेली राजकीय भूमिका ही एकमेकांच्या विरोधी असल्याने ते सध्या एकमेकांचे कट्टर विरोधक बनले आहेत. दोघेही एकमेकांवर टीका करण्यासाठी कोणताही क्षण सोडत नाहीत. गेल्या काही दिवसांपासून या दोघांमध्ये कोणत्या ना कोणत्या विषयावरून वाद, आरोप प्रत्यारोप सुरू आहेत. यामुळे राजेश क्षीरसागर यांनी शहाजी बापू यांना आपल्या जावयाला समजून सांगण्यासाठी अनेक वेळा सांगितले. मात्र, तरीही दोघांमधील संघर्ष काय कमी होताना दिसत नाहीय.

शिवसेनेचा महाअधिवेशन कोल्हापुरात पार पडत असल्याने याची संपूर्ण जबाबदारी ही राज्य नियोजन मंडळाचे कार्यकारी अध्यक्ष राजेश क्षीरसागर यांच्याकडे आहे. राजेश क्षीरसागर यांनी रागात अधिवेशनाच्या बाहेर स्वागतपर लावण्यात आलेल्या फ्लेक्समधून शहाजी बापूंचा फोटो वगळला असल्याची चर्चा सध्या सुरू आहे. यावर अद्याप तिघांकडून देखील कोणतीही प्रतिक्रिया आली नसली, तरी चर्चा मात्र जोरात सुरू आहेत.

दरम्यान, आज संध्याकाळी गांधी मैदान येथे शिंदे गटाची जाहीर सभा पार पडणार आहे. यामुळे या परिसरात मोठ्या प्रमाणात शिंदे गटातील नेत्यांचे बॅनर लावण्यात आले आहेत. याच परिसरात ठाकरे गटाचे शहराध्यक्ष व शहाजी बापू पाटील यांचे जावई रविकिरण इंगवले यांचं संपर्क कार्यालय आहे. यामुळे रविकिरण इंगवले यांनी शिवसेनाप्रमुख बाळासाहेब ठाकरे आणि त्यांच्यासोबत उद्धव ठाकरे यांचा भला मोठा बॅनर याच परिसरात लावत क्षीरसागर यांना डीवचण्याचा प्रयत्न केला आहे.