सिंधुदुर्ग : ठाकरे गटाचे प्रमुख उद्धव ठाकरे यांच्या कोकण दौऱ्यानंतर मोठा ट्विस्ट निर्माण होण्याची शक्यता असून त्यांचे कट्टर समर्थक आमदार वैभव नाईक यांनी भाजप नेते तथा मंत्री रवींद्र चव्हाण यांची भेट घेतल्याने मोठी खळबळ उडाली आहे. उद्धव ठाकरेंच्या दौऱ्यानंतर शिवसेना नेते उद्योग मंत्री उदय सामंत यांनी काही दिवसांतच ठाकरे यांच्या व्यासपीठावरील लोकप्रतिनिधी आमच्याकडे येतील, असं मोठे विधान केलं होतं. त्यामुळे या भेटीला महत्त्व प्राप्त झालंय.
वैभव नाईक आणि रवींद्र चव्हाण या उभयतांमधील भेटीमुळे कोकणच्या राजकारणात उलट सुलट चर्चांना सुरूवात झाली आहे. राज्याचे सार्वजनिक बांधकाम मंत्री रवींद्र चव्हाण आणि आमदार वैभव नाईक यांची कणकवलीतील शासकीय विश्राम गृहावर एका खोलीत भेट झाली. या भेटीच्या वृत्ताने सर्वांच्या भुवया उंचावल्या आहेत. वैभव नाईक हे शिंदे गटात प्रवेश करणार असल्याच्या अधून मधून बातम्या येत असतात. मात्र आज अचानक वैभव नाईक यांनी भाजपच्या रवींद्र चव्हाण यांची भेट घेऊन सर्वांनाच धक्का दिला. या भेटीचा तपशील अद्यापपर्यंत समजला नसला तरी या भेटीला वैभव नाईक यांनी दुजोरा दिलेला आहे.
अशोक चव्हाण राज्यसभेवर? तर नारायण राणे यांना लोकसभेच्या रिंगणात उतरवणार? चर्चांना उधाण
अलीकडील काही दिवसात राणे आणि नाईक एकमेकांवर टीका करणं टाळत होते. भास्कर जाधव यांनी सिंधुदुर्ग येथे राणे यांच्यावर टीका केल्यावर लगेचच निलेश राणे यांनी पत्रकार परिषद घेतली होती. या पत्रकार परिषदेतही वैभव नाईक यांच्याबद्दल विचारलेल्या प्रश्नाला निलेश राणे यांनी थेट टीकात्मक उत्तर देणं टाळलं होतं. उद्या भास्कर जाधव यांना उत्तर देण्यासाठी निलेश राणे सभा घेणार आहेत. या सभेत ते याच भेटीबाबत काही बोलतात का? हेही पाहणं महत्त्वाचं ठरणार आहे.