म. टा. खास प्रतिनिधी मुंबई : वांद्रे-कुर्ला संकुल (बीकेसी) जलमय न होण्यासाठी मुंबई महानगर प्रदेश विकास प्राधिकरणाने (एमएमआरडीए) उपाययोजना हाती घेतल्या आहेत. त्याअंतर्गत ‘जी’ ब्लॉकमधील नाल्याला विशेष भिंतीसह पाण्याच्या सुरळीत प्रवाहासाठी काँक्रीटची विशेष चौकट बसविली जाणार आहे.
बीकेसी परिसराला सध्या सातत्याने वाहतूककोंडीचा सामना करावा लागतो. त्यात पावसाळ्यादरम्यान तेथील लहान-मोठे नालेही अनेकदा भरतात व ते पाणी रस्त्यावर येऊन वाहतूककोंडी होते. या स्थितीवर मात करण्यासाठीच बीकेसीतील या लहान-मोठ्या नाल्यांना संरक्षक भिंत बसविण्याचे काम हाती घेण्यात आले आहे. त्यामध्ये सर्वात आधी ‘जी’ ब्लॉकमधील नाल्याचा समावेश करण्यात आला आहे. यासंबंधी एमएमआरडीएने निविदा काढली आहे.
या निविदेनुसार, जी ब्लॉकमधील दानी-व्होल्टेक्स या नाल्याला १०७५ मीटर लांबीची संरक्षक भिंत बसविली जाणार आहे. ही भिंत वास्तवात काँक्रिटच्या चौकटीच्या स्वरूपात असेल. त्याला ‘आरसीसी बॉक्स ड्रेन’ असे संबोधले जाते. यामुळेच नाल्याचे पाणी एका विशिष्ट चौकटीकडून वाहून जात बाहेर येत नाही.
जी ब्लॉकच्या उत्तर सीमेकडे ही चौकट बांधण्यासाठीचा सल्ला मागविण्यात आला आहे. या सल्लागारालाच यासाठीचे विस्तृत अभियांत्रिकी आराखडाही तयार करायचा आहे. त्यासाठीचा अभ्यास १८ महिन्यांत पूर्ण करायचा असून २२ फेब्रुवारी ही निविदेची अंतिम तारिख आहे.
सातत्याने रहदारी
बीकेसीतील ‘जी’ ब्लॉक हा अत्याधिक महत्त्वाच्या व मोठ्या वास्तूंचा आहे. आंतरराष्ट्रीय प्रदर्शनांचे जिओ कन्व्हेंशन सेंटर, नीता मुकेश अंबानी कल्चरल सेंटर, नॅशनल स्टॉक एक्स्चेंज इमारत, भारत डायमंड बोर्स, सॉफिटेल हॉटेल, अमेरिकन वाणिज्य दूतावास आदी ठिकाणे याच भागात असल्याने तेथे सातत्याने रहदारी असते. या स्थितीत पावसाळ्यात नाल्यातील पाणी साचून वाहतूक कोंडी टाळण्यासाठी हे काम केले जात आहे.