म. टा. प्रतिनिधी, छत्रपती संभाजीनगर : डॉ. बाबासाहेब आंबेडकर मराठवाडा विद्यापीठाचा २०२४-२५ चा अर्थसंकल्प तीनशे कोटी रुपयांचा आहे. सलग दुसऱ्या वर्षी अर्थसंकल्प तुटीचा नसेल. व्यवस्थापन परिषदेच्या नऊ फेब्रुवारीच्या बैठकीत अर्थसंकल्प ठेवला जाणार आहे. ‘विकसित भारत @२०४७’; जनजागृती करण्यासाठी वीस लक्ष रुपयांची तरतूद करण्यात आली आहे.

विद्यापीठाने २०२४-२५ आर्थिक वर्षात अपेक्षित तूट प्रत्यक्षात कमी करण्याचा यंदाही प्रशासनाचा प्रयत्न आहे. अर्थसंकल्प तयार करताना शैक्षणिक व संशोधन बाबींना प्राधान्य देण्यासाठी विद्यापीठाला कसरत करावी लागल्याचे सांगण्यात येते. अर्थसंकल्प तीन भागात तयार करण्यात आलेला आहे. यामध्ये पहिला भाग वेतन अनुदान व वेतनेतर तरतुदी, दुसरा भाग विद्यापीठ विकासासाठी योजना, तिसरा भाग स्वतंत्र प्रकल्प योजना आणि सहयोगी कार्यक्रम निधी असा आहे. विद्यापीठात विविध शुल्कापोटी प्राप्त होणाऱ्या उत्पन्नातून परीक्षा व्यय, प्रशासकीय खर्च, प्रवास भत्ते, शैक्षणिक व प्रशासकीय विभागाचा दैनंदिन खर्च, विविध उपक्रम, क्रीडा स्पर्धा, शास्त्रीय सामग्री व उपकरणे, संगणक व सॉफ्टवेअर, पुस्तके व नियतकालिकांची खरेदी, इमारती बांधकामांवर लक्ष देण्यात आले. यात शैक्षणिक, संशोधनापेक्षा बांधकाम, इतर सुविधांवर अधिक खर्चाला प्राधान्य दिल्याचेही काही व्यवस्थापन परिषद सदस्यांनी सांगितले. विद्यापीठ सुवर्ण महोत्सव संशोधन छात्रवृत्तीसाठी एक कोटी रुपयांची तरतूद करण्यात आली आहे. २००८-०९ शैक्षणिक वर्षापासून ही योजना राबविण्यात येते.

अर्थसंकल्पात जनजागृतीकडे लक्ष

विद्यापीठाने अर्थसंकल्पात ‘विकसित भारत @२०४७’ साठी अर्थसंकल्पात निधीची तरतूद केली आहे. विद्यापीठाने ‘विकसित भारत @२०४७’; जनजागृती करण्यासाठी २० लक्ष रुपयांची तरतूद करण्यात आली आहे. भारताला स्वातंत्र्य मिळाल्याच्या घटनेला २०४७ मध्ये शंभर वर्ष पूर्ण होतील. स्वातंत्र्याच्या शताब्दी वर्षापर्यंत भारत देश हा विकसित देश होण्याचे लक्ष केंद्र सरकारने ठेवले आहे. त्याअनुषंगाने जनजागृतीसाठी विद्यापीठस्तरावरुनही पुढील आर्थिक वर्षात प्रयत्न करण्यात येणार असल्याचे सांगण्यात येते.

विद्यापीठाने काय म्हटले..

अध्यापन, संशोधन व विकास, कौशल्य विकास प्रशिक्षण व शिक्षण, विस्तार व सेवा याद्वारे आणि परिणामकारक प्रात्यक्षिकांद्वारे आणि विद्यापीठ या नात्याने समाजजीवनावर प्रभाव पाडून, त्याद्वारे ज्ञान व सामंजस्य यांचा प्रसार, निर्मिती व जपणूक करणे. सर्वांना उच्च शिक्षणाचे अध्यापन, अध्ययन, प्रशिक्षण व इतर आधारभूत सेवासुविधा यांची समान संधी उपलब्ध करून देण्यावर भर असल्याचे विद्यापीठाने अर्थसंकल्पात म्हटले आहे. यामध्ये दिव्यांग, ट्रान्सजेंडर यांच्यासाठी आवश्यक सोई-सुविधा उपलब्ध करून देणे, कमवा व शिका योजना, विद्यार्थी, कर्मचाऱ्यांसाठी विमा सुविधा, ग्रंथालय परिसराजवळ विद्यार्थ्यांची गरज लक्षात घेऊन विद्यार्थ्यांना भोजनास बसण्याची व्यवस्था करणे, परीक्षा विभागात ऑनस्क्रीन इव्हॅल्युएशन, डिजिटलायजेशन ऑफ रेकॉर्ड सुविधा आदींवर भर देण्यात आल्याचे म्हटले आहे.

असा आहे खर्च

वेतन अनुदान व खर्च एवढा अपेक्षित… ९३.६९ कोटी रुपये

विद्यापीठ निधीतून भरलेले शिक्षक, शिक्षकेतर पदांचे वेतन.. ३.८४ कोटी रुपये

कंत्राटी कामावरील खर्च, संरक्षण, स्वच्छता कर्मचारी आदींसाठी..२२.४५ कोटी रुपये

परीक्षा विभागावरील खर्च……… २२.२२ कोटी रुपये

विद्यापीठ परिसर, उपपरिसरात इमारती, रस्त्यांसाठी.. २१.२३ कोटी रुपये

शिबिर, चर्चासत्रे, कार्यशाळा, सहयोगी प्राध्यापक योजनासाठी… १०.५७ कोटी रुपये

विद्यापीठ सुवर्ण महोत्सव संशोधन छात्रवृत्तीसाठी १ कोटी रुपये

विद्यार्थी कल्याण कार्यक्रम, युवक महोत्सव आदींसाठी.. १.४० कोटी रुपये

मुलांचे वसतिगृह, उपपरिसरात मुलांचे वसतिगृह …….. ३.७६ कोटी रुपये

ग्रंथालयासाठी पुस्तके, डेटा बेसेस्, सॉफ्टवेअरसाठी २.६८ कोटी रुपये

क्रीडा स्पर्धा, क्रीडा साहित्यासाठी .. १.२४ कोटी रुपये

धाराशीव येथील उपपरिसरात क्रींडागण ५० लाख रुपये

ग्रीन एनर्जी.. १० लाख रुपये

अटल इन्क्युबेशनसाठी………… ३० लाख रुपये