सीएसएमटी ते पनवेलदरम्यान सध्या ताशी ८० किमी वेगाने लोकल धावतात. या वेगाने सीएसएमटी ते पनवेल अंतर पार करण्यासाठी ८० मिनिटे लागतात. हार्बर मार्गावरील प्रवाशांचा प्रवास वेळ वाचवण्यासाठी ताशी १०५ वेग निश्चित करण्यात आला आहे. या वेगामुळे सीएसएमटी ते पनवेल अंतर ६५-७० मिनिटांत पूर्ण करणे शक्य होणार आहे, असे वरिष्ठ रेल्वे अधिकाऱ्यांनी सांगितले.

पहिल्या तिमाहीत लाभ

रेल्वेरुळांचे मजबूतीकरण, रुळांलगत असलेल्या झोपड्या हटवणे आणि ओव्हरहेड वायरमध्ये आवश्यकतेनुसार बदल या गोष्टी वेग वाढवण्यासाठी करण्यात येणार आहेत. नव्या वर्षाच्या पहिल्या तिमाहीपर्यंत कामे पूर्ण करून वेग वाढवण्याचे नियोजन आहे. कामे पूर्ण झाल्यावर नव्या वेगाने चाचणी घेण्यात येईल. त्यानंतर प्रवासी वाहतुकीसाठी नवा वेग लागू करण्यात येणार आहे. सीएसएमटी-पनवेलसह सीएसएमटी-बेलापूर दरम्यानच्या प्रवासवेळेतही काही मिनिटांची बचत अपेक्षित आहे.

मराठा आरक्षणप्रश्नी मुदतीवर अडून राहू नका, आणखी वेळ द्या, शिष्टमंडळाच्या विनंतीवर जरांगे म्हणाले…

ठाणे-वाशीही सुसाट

ट्रान्सहार्बरवरील ठाणे-वाशी, नेरुळ-खारकोपर आणि कर्जत ते खोपोलीदरम्यानच्या मार्गांवर वेग वाढवण्याच्या प्रस्तावाला मंजुरी देण्यात आली आहे. त्यामुळे हार्बरसह ट्रान्सहार्बर प्रवाशांच्या वेळेतही अंशतः घट अपेक्षित आहे.

वाढीव फेऱ्यांबाबत निर्णय नाही

मध्य रेल्वेच्या हार्बर मार्गावर सीएसएमटी ते पनवेलदरम्यान १८८ आणि सीएसएमटी ते बेलापूरदरम्यान ७९ लोकल फेऱ्या धावतात. गाड्यांचा वेग वाढल्यास अतिरिक्त लोकल फेऱ्या चालवणे शक्य आहे का, याबाबत अद्याप निर्णय घेण्यात आलेला नाही.

उशिरा घेतलेला निर्णय

मध्य रेल्वेच्या मुख्य मार्गावर लोकल फेऱ्या ताशी शंभरपेक्षा जास्त वेगाने धावत्या आहेत. हार्बर मार्गावर केवळ ताशी ८०च्या वेगाने लोकल धावतात. हार्बर मार्गावरील अतिरिक्त जलद लोकल सुरू करावी आणि गाड्यांचा वेग वाढवावा, अशी मागणी प्रवाशांकडून सातत्याने केली जात आहे. अखेर उशिरा का होईना वेग वाढवण्याच्या हालचाली मध्य रेल्वे प्रशासनाने सुरू केल्या आहेत. प्रशासनाने तातडीने अंमलबजावणी करून प्रवाशांसाठी वेगवान लोकल उपलब्ध करून द्याव्यात, अशी प्रतिक्रिया हार्बर मार्गावरील नियमित प्रवासी योगेश ढगे यांनी व्यक्त केली.

Mumbai Local: पश्चिम रेल्वे प्रवाशांसाठी मोठी बातमी; गोखले पूल कामासाठी आज ‘या’ आठ लोकल रद्द

म्हणून सीएसएमटी-टिळकनगर नाही

टिळकनगर ते पनवेलदरम्यान लोकल वेग वाढवण्यात येणार आहे. सीएसएमटी ते टिळकनगर दरम्यान दोन स्थानकांमधील अंतर कमी आहे. यामुळे कमाल वेग गाठणे लोकलला शक्य होत नाही. टिळकनगर ते गोवंडी दरम्यान रुळांलगत दाटीवाटीने झोपडपट्टी आहे. परिणामी रेल्वेरूळ ओलांडणाऱ्यांचे प्रमाण या विभागात अधिक आहे. सर्वसामान्यांच्या सुरक्षिततेसाठी सीएसएमटी ते टिळकनगर दरम्यान वेगमर्यादा जैसे थे ठेवण्यात आली आहे.

विभाग (अंतर) सध्याची वेगक्षमता (प्रतितास किमी) प्रस्तावित वेगक्षमता (प्रतितास किमी)

टिळकनगर-पनवेल (३३ किमी) ८० १०५

ठाणे-वाशी (१८ किमी) ८० १०५

कर्जत-खोपोली (१५ किमी) ६० ९०

नेरूळ-खारकोपर (९ किमी) ८० १०५

Read Latest Maharashtra News And Marathi News