शुक्रवारी एकप्रकारे पं. तेरदाळ यांच्या गुरूंनी सुरू केलेल्या महोत्सवात त्याने पहिल्यांदा सादरीकरण केले आणि एक वर्तुळ पूर्णत्वाकडे गेल्याचे जाणवले. पुण्यात पहिल्यांदाच आणि तेही सवाईत, हजारो रसिकांसमोर त्याने आपली कला सादर करीत ज्येष्ठांपासून तरुणांपर्यंत सर्वांनाच आपलेसे केले. अनेक ज्येष्ठ नागरिकांनी त्याचे तोंड भरून कौतुक करणाऱ्या प्रतिक्रिया महोत्सवाचे निवेदक आनंद देशमुख यांच्यापर्यंत पोहोचवल्या. यातूनच त्याला त्याच्या सादरीकरणाची पावती मिळाली. महोत्सवाचे आयोजक श्रीनिवास जोशी यांनीही बेळगाव भेटीच्या आठवणी सांगत त्याची कला यापूर्वीच हेरली होती, असे सांगितले. शुक्रवारी दुपारी झालेल्या या आश्वासक गायकाच्या सादरीकरणाने सवाई फक्त दिग्गज कलाकारांचे व्यासपीठ नसून, आता ते अभिजात संगीताचे भविष्य घडवणारे व्यासपीठही आहे, यावर शिक्कामोर्तब झाले.
वाचनसंस्कृतीचा कुंभमेळा! पुणे पुस्तक महोत्सवाचे आज उद्घाटन, २ लाख पुस्तकं पाहण्याची अन् खरेदीची संधी
…आणि दोन मित्रांची भेट झाली

गेल्या वर्षी महोत्सवाचे आयोजक श्रीनिवास जोशी यांचा पुत्र विराज जोशी याने सवाई गंधर्व भीमसेन महोत्सवात सादरीकरण केले. विराज आणि रजत हे लहानपणापासून एकमेकांना ओळखतात. दोघांच्या वयात एक-दोन वर्षांचे अंतर. शुक्रवारी सादरीकरणानंतर व्यासपीठामागे दोघेही एकमेकांना भेटले आणि विराजने मिठी मारून रजतचे कौतुक केले. लहानपणीच दोघांच्या संगीताचा सुरू झालेला प्रवास कधी तरी नक्की एकत्र एका मंचावर येईल, अशी आशा व्यक्त करीत आम्हाला एकत्र गायला नक्की आवडेल, असेही सांगितले.

देवाचरणी माझी सेवा

‘माझे गुरू पं. अनंत तेरदाळ हे पं. भीमसेन जोशी यांचे शिष्य होते. यामुळे आज गुरूंच्या गुरूंनी स्थापलेल्या या मंचावर सादरीकरण करायला मिळाले, ही एकप्रकारे देवाच्या चरणी केलेली सेवा आहे. मी आज जे काही आहे ते माझ्या आई-वडिलांमुळे आहे. त्यांनी आयुष्यात स्वतः कष्ट करून माझा संगीतप्रवास सुरू ठेवला. ही गोष्ट आजन्म विसरणार नाही,’ अशा भावना रजतने ‘महाराष्ट्र टाइम्स’शी बोलताना व्यक्त केल्या.