ही घटना ७ डिसेंबर रोजी रात्री साडे आठच्या सुमारास घडली. धीरज हे भाजीपाला विक्रेता आहेत. त्यांचा पहिल्या पत्नीसोबत काडीमोड झाल्याचे कळते. त्यांचे किरणसोबत झालेले हे दुसरे लग्न आहे. ११ महिन्यांपूर्वीच त्यांचे लग्न झाले. तेव्हापासून ते विठ्ठलनगर परिसरात भाड्याच्या घरात सोबतच राहतात. सुरुवातीला त्यांच्यात सुसंवाद होता. मात्र, किरणला धीरजवर संशय येऊन लागल्याने त्यांचा वाद सुरू झाल्याचे कळते.

गेल्या काही दिवसांपासून दोघांमध्ये सातत्याने वाद सुरू आहेत. घटनेच्या दिवशी धीरज भाजीपाला विक्रीचे काम आटोपून घरी आले. ते पलंगावर झोपून मोबाइल बघत होते. यावेळी किरणने त्यांना पलंगाच्या दुसऱ्या बाजुने झोपण्यास सांगितले. त्यांनी ते न ऐकल्याने किरण संतप्त झाली. तिने घरातील ॲसिड त्यांच्या अंगावर फेकले. यात ते गंभीर जखमी झाले. त्यावर मेडीकल रुग्णालयात उपचार सुरू आहेत. पोलिसांनी या प्रकरणी गुन्हा दाखल करून तपास सुरू केला आहे.