जखमी ज्ञानेश्वरी आणि शंकर भामरे यांना नागरिकांनी तात्काळ पहूर ग्रामीण रुग्णालयात उपचारासाठी दाखल केले. वैद्यकीय अधिकाऱ्यांनी ज्ञानेश्वरीला मयत घोषित केले. तर जखमी वडील शंकर भामरे यांच्यावर उपचार सुरु आहेत. दरम्यान आयशर चालक सुनिल ज्ञानदेव सोनवणे (रा. अंजनवटी ता. जिल्हा बीड) यास पहूर पोलिसांनी ताब्यात घेतले आहे. शवविच्छेदन करून सायंकाळी शोकाकुल वातावरणात ज्ञानेश्वरी भामरे हिच्यावर अंत्यसंस्कार करण्यात आले.

दरम्यान या अपघातामुळे पहूर येथील ग्रामस्थ आक्रमक झाले आहेत. जळगाव ते छत्रपती संभाजीनगर महामार्गालगत असलेल्या वाघूर नदीवरील पुलाचे काम सध्या सुरू आहे. या रस्त्याची अवस्था अतिशय गंभीर असून येणाऱ्या जाणाऱ्यांना त्याचा त्रास होत आहे. या ठिकाणी अनेक छोटे-मोठे अपघातही दररोज होत आहेत. रस्त्याचे काम त्वरित व्हावे, यासाठी पहूर येथील संतप्त ग्रामस्थ आणि सर्वपक्षीय पदाधिकाऱ्यांनी पहूर बस स्थानकासमोर रास्ता रोको आंदोलन केले.