म. टा. विशेष प्रतिनिधी, नागपूर : ‘आरोग्यसेवेतील असमानता ही देशातील एक मोठी समस्या आहे. मात्र, देशाच्या सर्वांगीण विकासासाठी आरोग्यसेवा स्वस्त व सुलभ असण्याची गरज आहे’, असे प्रतिपादन राष्ट्रपती द्रौपदी मुर्मू यांनी केले. शासकीय वैद्यकीय महाविद्यालय व रुग्णालयाचा (मेडिकल) अमृतमहोत्सवी सोहळा शुक्रवारी सायंकाळी मेडिकलच्या पटांगणात झाला. त्यावेळी राष्ट्रपती बोलत होत्या.
या समारंभाच्या अध्यक्षस्थानी राज्यपाल रमेश बैस होते. उपमुख्यमंत्री देवेंद्र फडणवीस, वैद्यकीय शिक्षण मंत्री हसन मुश्रीफ, मेडिकलचे अधिष्ठाता डॉ. राज गजभिये आदी व्यासपीठावर उपस्थित होते.
या समारंभाच्या अध्यक्षस्थानी राज्यपाल रमेश बैस होते. उपमुख्यमंत्री देवेंद्र फडणवीस, वैद्यकीय शिक्षण मंत्री हसन मुश्रीफ, मेडिकलचे अधिष्ठाता डॉ. राज गजभिये आदी व्यासपीठावर उपस्थित होते.
‘आपल्या देशात अवयवदात्यांची संख्या कमी आहे. त्यामुळे त्यासाठीची प्रतीक्षायादी मोठी आहे. दुसरीकडे, अवयवांचा अवैध व्यवहारही फोफावण्याची भीती आहे. ते टाळण्यासाठी वैद्यकीय क्षेत्राने अवयवदानासंबंधी जनजागृती करावी’, असे आवाहन राष्ट्रपतींनी यावेळी केले.
प्रास्ताविकात अधिष्ठाता डॉ. राज गजभिये यांनी ७५ वर्षांच्या वाटचालीचा आढावा घेतला. राष्ट्रपतींचे आगमन होताच राष्ट्रगीत झाले. त्यानतंतर दीपप्रज्वलन व अतिथींचे स्वागत झाले. डॉ. शकुंतला गोखले स्मृती सभागृहाचे उद्घाटन तसेच अमृतमहोत्सवानिमित्त काढलेल्या टपाल तिकिटाचे लोकार्पण राष्ट्रपतींच्या हस्ते झाले. कार्यक्रमाची सांगता राष्ट्रगीतने झाली. संचालन श्वेता शेलगावकर यांनी केले.
बोन मॅरो सेंटर लवकरच : गडकरी
नागपूर विभागात सिकलसेल व थॅलेसेमिया रुग्णांची संख्या मोठी आहे. त्यांच्या उपचारांसाठी लवकरच येथे बोन मॅरो सेंटर सुरू होईल, अशी माहिती नितीन गडकरी यांनी यावेळी दिली. आज देशाच्या विविध भागांतून लोक नागपुरात उपचारासाठी येतात. त्यामुळे हे शहर मध्य भारतातील मोठे मेडिकल हब झाले आहे. मेडिकलचे कार्य संपूर्ण महाराष्ट्रासाठी अभिमानास्पद असल्याचे गडकरी म्हणाले.
चेहरा मोहरा बदलेल : फडणवीस
मेडिकलच्या विकासासाठी राज्य सरकारने साडेपाचशे कोटी रुपये दिले आहेत. त्या कामांना प्रारंभही झाला आहे. गरजू माणसाला अत्याधुनिक आरोग्यसेवा मिळाली पाहिजे, त्यादृष्टीने सुसज्ज असे अत्याधुनिक रुग्णालय करण्याचा आमचा संकल्प आहे. त्यामुळे येत्या वर्षभरात येथील चेहरामोहरा बदलेला दिसेल, असे देवेंद्र फडणवीस यांनी यावेळी सांगितले.
डॉ. प्रकाश आमटे यांचा उल्लेख
नागपूर मेडिकलच्या विद्यार्थ्यांनी राष्ट्रीय व आंतरराष्ट्रीय स्तरावर विविध क्षेत्रांत उल्लेखनीय कामगिरी केली आहे, हे सांगताना राष्ट्रपतींनी डॉ. प्रकाश आमटे यांचा विशेषत्वाने उल्लेख केला.
फडणवीसांचा जन्म, तर गडकरींवर उपचार
‘माझा जन्म याच मेडिकल कॉलेजमध्ये झाला. त्यामुळे ही माझी जन्मभूमी आहे’, असे देवेंद्र फडणवीस यांनी सांगितले. तर, ‘जन्मानंतर प्रकृती बिघडल्याने मला मेडिकलमध्ये दाखल करण्यात आले होते व येथील उपचारांमुळेच मी बरा झालो’, असे नितीन गडकरी यांनी सांगून जन्मापासूनच मेडिकलशी असलेल्या ऋणानुबंधांना उजळा दिला.
मान्यवरांचा गौरव
मेडिकलच्या पहिल्या बॅचचे विद्यार्थी ९५वर्षीय डॉ. बी. जे. सुभेदार, मेडिकलसाठी जागा देणारे लेफ्टनंट जनरल के. व्ही. कुकडे यांचे नातू कर्नल दिनकर कुकडे, मेडिकलला ५५ लाख रुपयांची देणगी ज्यांच्या स्मरणार्थ देण्यात आली त्या येथील माजी विद्यार्थिनी डॉ. शकुंतला गोखले यांचे आप्त लिमये, डॉ. प्रमोद गिरी यांचा राज्यपाल रमेश बैस यांच्या हस्ते या समारंभात सत्कार करण्यात आला.