म. टा. प्रतिनिधी, छत्रपती संभाजीनगर : वडिलोपार्जित शेतीची सातबाऱ्यावर नोंद करण्यासाठी २० हजारांची मागणी करून १८ हजारांची लाच घेणारा आमठाणा (ता. सिल्लोड) येथील तलाठी संजय विसपुतेसह दलाल गजानन सोमासे या दोघांना लाचलुचपत प्रतिबंधक पथकाने सापळा रचून अटक केली.
काय प्रकरण?
काय प्रकरण?
पथकाने दिलेल्या माहितीनुसार, सिल्लोड तालुक्यातील एका शेतकऱ्याने वडिलोपार्जित गट क्रमांक ४२७ मधील वाटणी पत्राआधारे ०.६० आर जागा मुलाच्या नावाने करून दिली होती. वाटणीपत्राची नोंद सातबारावर घेण्यासाठी मौजे आमठाणाचा तलाठी संजय दिगंबर विसपुते (वय ४८) याने २० हजारांची मागणी केली. लाच देण्याची इच्छा नसल्याने शेतकऱ्याने लाचलुचपत प्रतिबंधक पथकाचे पोलिस अधीक्षक संदीप आटोळे यांच्याकडे तक्रार नोंदवली.
पोलिस निरीक्षक सचिन साळुंखे यांच्या पथकाने शहनिशा केली असता संजय विसपुते याने दलाल गजानन भिकन सोमासे (वय २६) याच्या मार्फत लाचेची मागणी करून तडजोड करत १८ हजारांची मागणी केल्याचे निष्पन्न झाले. यावरून पोलिस निरीक्षक सचिन साळुंखे यांच्या पथकाने सापळा रचून गजानन सोमासे याच्यासह तलाठी संजय विसपुते या दोघांना अटक केली. या प्रकरणी सिल्लोड पोलिस ठाण्यात गुन्हा दाखल करण्यात आला आहे.