‘या इंटर्नशिपमध्ये राज्यातील कोणत्याही मान्यताप्राप्त विधी महाविद्यालय किंवा विद्यापीठातील पदवी, पदव्युत्तर पदवीचे शिक्षण घेणाऱ्या विद्यार्थ्यांना सहभागी होता येईल. पाच वर्षांच्या पदवी अभ्यासक्रमातील चौथ्या किंवा पाचव्या वर्षातील, तर तीन वर्षांच्या अभ्यासक्रमातील दुसऱ्या किंवा तिसऱ्या वर्षातील विद्यार्थ्यांना अर्ज सादर करता येणार आहे. त्याचप्रमाणे इंटर्नशिपसाठी पदव्युत्तर पदवीमधील पहिल्या किंवा दुसऱ्या वर्षात शिकत असलेले विद्यार्थी पात्र आहेत. दहा विद्यार्थ्यांची गुणवत्तेच्या आधारे निवड केली जाणार आहे,’ असे विधी आणि न्याय विभागाच्या निर्णयात सांगितले आहे.

विद्यार्थ्यांच्या इंटर्नशिपचा कालावधी एक जानेवारी ते नऊ फेब्रुवारी २०२४ असा राहणार आहे. त्यासाठी विद्यार्थ्यांना एक ते १५ डिसेंबर या कालावधीत sec.legislation@maharashtra.gov.in या ईमेलवर अर्ज करता येतील. विधी महाविद्यालये आणि विद्यापीठामधून प्रत्येकी दोन विद्यार्थ्यांचे अर्ज पाठवता येणार आहेत. दोन विद्यार्थ्यांपैकी एका विद्यार्थ्याची निवड केली जाणार आहे. प्राप्त अर्जांमधून एकूण दहा विद्यार्थ्यांची निवड करण्याचे अधिकारी विधी विधानच्या सचिवांना असतील, असे निर्णयात सांगितले आहे. दरम्यान, या इंटर्नशिपसाठी कोणत्याही प्रकारचे स्टायपेंड, खर्च, मानधन किंवा भत्ता देण्यात येणार नसल्याचेही निर्णयात स्पष्ट करण्यात आले आहे.