गावोगावी या रथयात्रेला प्रचंड असा प्रतिसाद मिळाला. स्वतःच्या खर्चाने आणि स्वयंस्फुर्तीने या महामोर्चात सहभागी होण्याचे वचन देत गावोगावी शेतकरी रविकांत तुपकरांच्या पाठीशी उभे राहत आहेत. त्यामुळे शेतकऱ्यांचे हे प्रचंड मोठे वादळ उद्या जिल्हाधिकारी कार्यालयावर धडक देणार आहे. बुलढाणा शहरातील जिजामाता व्यापारी क्रीडा संकुल येथून दुपारी १२ वाजता या महामोर्चाची सुरुवात होणार आहे. शहरातील मुख्य मार्गाने फिरून हा मोर्चा जिल्हाधिकारी कार्यालयावर पोहोचेल त्यानंतर तेथे या मोर्चाचे सभेत रूपांतर होऊन रविकांत तुपकरांची तॊफ धडाडणार आहे.

सोयाबीन – कापसाला दरवाढ मिळावी तसेच येलो मोझॅक, बोंडअळीमुळे व पावसात खंड पडल्याने सोयाबीन – कापूस व इतर पिकांच्या झालेल्या नुकसानीपोटी एकरी १० हजार रुपये सरसकट नुकसान भरपाई मिळावी. पिकविमा व शेतकरी, शेतमजूर, तरुण, महिला बचत गट, तरुणांच्या न्याय हक्काच्या मागण्यांसाठी शेतकरी नेते रविकांत तुपकर यांच्या नेतृत्वात हा महामोर्चा निघणार आहे. केवळ शेतकऱ्यांच्या हितासाठी हा लढा आहे. त्यामुळे कोणतेही पक्ष, संघटना व राजकारण बाजूला ठेवून या आंदोलनात सर्वांनी सहभागी व्हावे असे आवाहन रविकांत तुपकर यांनी केले आहे.

या महामोर्चात शेतकरी नेते रविकांत तुपकर पुढील राज्यव्यापी आंदोलनाची नेमकी काय घोषणा करतात याकडे सर्वांचे लक्ष लागून आहे. यापूर्वीची रविकांत तुपकरांची आंदोलने आक्रमक राहिली आहेत. दोन वर्षांपूर्वीचे अन्नत्याग आंदोलन राज्यभर चांगलेच पेटले होते. तर गेल्या वर्षी थेट मुंबईतील अरबी समुद्रातील जलसमाधी आंदोलनाने राज्यभरातील पोलीस यंत्रणा रस्त्यावर उतरली होती. सरकार हादरले होते.
तत्वज्ञान सांगणाऱ्या महापुरुषांची परंपरा केवळ भारतात; मोहन भागवत यांचे प्रतिपादन
मुख्यमंत्री आणि उपमुख्यमंत्री यांनी चर्चेला बोलावून राज्य शासनाच्या आधारित असलेल्या बहुतांश मागण्या पूर्ण केल्या होत्या. तर आत्मदहन आंदोलनामुळे तुपकरांना आणि सहकाऱ्यांना तुरुंगवास भोगावा लागला होता. तुपकरांच्या आंदोलनांमुळे शेतकऱ्यांना मोठ्या प्रमाणात पीकविमा, नुकसानभरपाई, सततच्या पावसाची नुकसानभरपाई मिळाली. शेतकऱ्यांना मोठा फायदा झाला आहे. त्यामुळे यावर्षी रविकांत तुपकर नेमकी कोणत्या आक्रमक आंदोलनाची घोषणा करतात याकडे राज्यातील सर्वांचेच लक्ष लागून आहे.