मुंबई : आपला लांबचा प्रवास सुखद व सुखकर व्हावा यादृष्टीने आपण लांबपल्ल्याच्या रेल्वेगाडीचे रीतसर आरक्षण करतो आणि त्यादृष्टीने प्रवासाला सुरुवात करतो. मात्र, त्याच प्रवासात रेल्वेतर्फे पुरवले जाणारे जेवण जेव्हा निकृष्ट दर्जाचे असल्याचे आढळते तेव्हा आपल्या त्याच सुखकर प्रवासाच्या अपेक्षेत मीठाचा खडा पडतो. असाच अनुभव आलेल्या एका प्रवाशाने निकृष्ट जेवण, मेन्यूमधील ठरलेल्या पदार्थांपैकी काही पदार्थच नाहीत व काही पदार्थ निम्मेच आहेत आणि या जेवणाची किंमतही दुप्पट लावली जात आहे, हे पाहून दाद मागितली. ‘आयआरसीटीसी’नेही त्या प्रवाशाच्या तक्रारीची गंभीर दखल घेत संबंधित कंत्राटदाराला नुकताच पाच हजार रुपयांचा दंड लावून सक्त ताकीदही दिली.
ओडिशामधील जगन्नाथ पुरीच्या यात्रेसाठी सहकुटुंब गेल्यानंतर २७ सप्टेंबरला पुरी ते लोकमान्य टिळक टर्मिनसदरम्यानच्या प्रवासात नवी मुंबईतील अनुज गुप्ता यांना हा अनुभव आला. त्यामुळे त्यांनी इंडियन रेल्वे कॅटरिंग अँड टुरिजम कॉर्पोरेशन लिमिटेडकडे (आयआरसीटीसी) ई-मेलद्वारे रितसर तक्रार दाखल केली होती.
ओडिशामधील जगन्नाथ पुरीच्या यात्रेसाठी सहकुटुंब गेल्यानंतर २७ सप्टेंबरला पुरी ते लोकमान्य टिळक टर्मिनसदरम्यानच्या प्रवासात नवी मुंबईतील अनुज गुप्ता यांना हा अनुभव आला. त्यामुळे त्यांनी इंडियन रेल्वे कॅटरिंग अँड टुरिजम कॉर्पोरेशन लिमिटेडकडे (आयआरसीटीसी) ई-मेलद्वारे रितसर तक्रार दाखल केली होती.
‘आम्ही ३-टियर वातानुकूलित डब्यातून प्रवास करत असताना कंत्राटदार कंपनीचा कर्मचारी जेव्हा जेवणाबाबत विचारण्यासाठी आला तेव्हा आम्ही चार थाळी जेवण देण्याची विनंती केली. मात्र, त्याने प्रत्येक थाळीसाठी दीडशे रुपये सांगितले आणि त्याबाबत बिलही देण्याची त्याची तयारी नव्हती. म्हणून आम्ही खानपानचे व्यवस्थापक (पँट्री कार मॅनेजर) संतोष राठोड यांना भेटून तक्रार केली. तेव्हा त्याने ठरल्याप्रमाणे ८० रुपये थाळीप्रमाणेच जेवण देण्याची ग्वाही दिली. त्याप्रमाणे आम्ही चार थाळींचे ३२० रुपये दिल्यानंतर त्याने तसे बिल दिले. मात्र, नंतर जे जेवण आले तेही निकृष्ट दर्जाचे होते. ‘आयआरसीटीसी’च्या संकेतस्थळावर रेल्वेगाडीत ८० रुपयांत मिळणाऱ्या शाकाहारी थाळीमध्ये दोन पराठे किंवा चार चपात्या, १५० ग्रॅम साधा भात, १५० ग्रॅम दाट डाळ किंवा सांबर, ८० ग्रॅम दही, लोणचे असे अन्नपदार्थ नमूद आहेत.
मात्र, आमच्या प्रत्येकाच्या थाळीत दोनच चपात्या आणि डाळ अगदी पातळ पाण्याप्रमाणे होती. शिवाय त्यात दही नव्हतेच. त्याबाबत वेटरला विचारले असता, या गाडीत एवढेच जेवण असते, दह्याचा साठा संपला आहे आणि आमच्याकडेच डाळ पुरेशा प्रमाणात येत नसल्याने डाळ अशी असल्याचे त्याने सांगितले. त्याने आपले नाव सांगण्यास नकार दिला. तसेच थोड्या वेळाने एक वेटर ३० ते ४० रुपयांत प्रवाशांना सुटे दही विकत असल्याचे आम्ही पाहिले. अशाप्रकारे उघडपणे नियमांचा भंग व सेवेत कुचराई सुरू असल्याने याची चौकशी करून संबंधितांवर कारवाई करावी’, असे अनुज गुप्ता यांनी तक्रारीत म्हटले होते.
‘आयआरसीटीसी’ने या तक्रारीची गंभीर दखल घेत चौकशी केल्यानंतर रेल्वेगाडीत प्रवाशांना जेवण पुरवणाऱ्या मेसर्स आर.के. असोसिएट्स अँड हॉटेलियर्स प्रायव्हेट लिमिटेड या कंत्राटदार कंपनीला पाच हजार रुपयांचा दंड लावला. ‘सक्षम प्राधिकाऱ्याने या तक्रारीची गंभीर दखल घेतली आहे. त्यामुळे तुम्हाला सक्त ताकीद देण्यात येत आहे. यापुढे असा प्रकार घडल्यास योग्य ती कायदेशीर कारवाई करण्यात येईल’, असेही ‘आयआरसीटीसी’चे अधिकारी संजय चक्रवर्ती यांनी आदेशात नमूद केले.
‘प्रवाशांनी सजग राहून दाद मागावी’
‘रेल्वेगाडीत निकृष्ट व बेचव जेवण मिळण्याचा हा पहिलाच प्रकार नसेल. देशभरात दररोज लाखो संख्येत प्रवास करणाऱ्या रेल्वे प्रवाशांपैकी कित्येकांना असा अनुभव येत असेल. शिवाय कंत्राटदार कंपन्यांकडून नियमाप्रमाणे योग्य जेवण देण्याच्या सेवेतही हयगय केली जात असेल. त्यामुळे प्रवाशांनी सजग राहून दाद मागणे गरजेचे आहे’, असे आवाहन गुप्ता यांनी याबाबत ‘मटा’शी बोलताना केले.
Pune News: पुणेकरांसाठी महत्त्वाची बातमी: विद्यापीठ चौकात आजपासून वाहतूक बदल; असे असतील बदल…