अहमदनगर: माझ्यावर कारवाई केली तर तुम्हाला अॅन्टी करप्शनमध्ये घालवीन अशी धमकी देत वाळू तस्कराने कारवाईसाठी गेलेल्या महसूल पथकातील तलाठ्याला काठीने मारहाण केली. तसेच जप्त करून घेऊन जात असलेला वाळूचा डंपर पळवून नेलाय. सदरची धक्कादायक घटना गुरुवारी सकाळी सहा वाजेच्या दरम्यान कोपरगाव तालुक्यातील जेऊर कुंभारी शिवारात घडली. या घटनेने कोपरगाव तालुक्यात एकच खळबळ उडाली आहे. सरकारी कामात अडथळा आणल्याप्रकरणी कोपरगाव शहर पोलीस ठाण्यात डंपरवरील अनोळखी चालक तसेच मारहाण करणाऱ्या चार वाळू तस्कराविरुद्ध विविध कलमान्वये गुन्हा दाखल करण्यात आला आहे. वाळू तस्करांविरुद्ध महसूल यंत्रणा ऍक्टिव्ह झाल्याने गोदावरी नदीपत्रातून वाळू उपसा करणाऱ्या वाळू चोरांचे चांगलेच धाबे दणाणले आहेत.
याबाबत अधिक माहिती अशी की, सध्या गोदावरी नदीपात्रातून बेसुमार अवैध वाळू उपसा करत चोरटी वाहतूक होत असल्याची माहिती तहसीलदार संदीप कुमार भोसले यांना मिळाली. त्यांनी महसूल विभागाचे एक पथक सोबत घेत देरडे कोऱ्हाळे परिसरात करवाई केली. तहसील कार्यालय कोपरगाव येथील पथकाने पकडलेला वाळू चोरीचा विना नंबरचा डंपर तहसील कार्यालय कोपरगाव येथे कारवाई कामी घेवून जात असताना गुरुवारी सकाळी 5:45 वाजेच्या सुमारास जेऊर कुंभारी शिवारातील एच.पी. पेट्रोल पंपा जवळ सिल्वर रंगाची स्विफ्ट डिझायर गाडीमध्ये आरोपी राजू शेख व इतर अनोळखी इसम यांनी येवून संगनमत करून डंपर थांबवला. आरोपी राजू शेख याने फिर्यादी तलाठी प्रवीण डहाके यांना डंपर मधुन हा धरून डंपरच्या खाली ओढले व माझ्यावर कारवाई केली तर मी तुम्हाला अॅन्टी करप्शनमध्ये घालवीन अशी धमकी दिली. तसेच त्याच्या सोबत असलेला अनोळखी आरोपी ईसमाने डहाके यांच्या हातातील मोबाईल हिसकावून घेत असताना त्यांनी त्यास विरोध केला.
यावेळी आरोपी इसमाने त्याचे हातातील काठीने फिर्यादी तलाठी यांच्या उजव्या पायावर व उजव्या हातावर मारहाण करून दुखापत केली. तसेच धाक दपटशा दाखवून ढंपर मधील वाळु ही रस्त्यावरच ओतून देली आणि ढंपर घेवून तेथून पळून गेले आहे. याप्रकरणी कोपरगाव शहर पोलीस ठाण्यात तलाठी प्रवीण डहाके यांच्या फिर्यादीवरून आरोपी राजू शेख डंपरवरील अनोळखी चालक आणि इतर तिघे अशा पाच जणांविरुद्ध भादंवी कलम 353, 332,379, 143,147149,506 सह पर्यावरण संरक्षण कायद्यानुसार गुन्हा दाखल करण्यात आला आहे. घटनेचा पुढील तपास पोलीस निरीक्षक प्रदीप देशमुख यांच्या मार्गदर्शनाखाली पोलीस उपनिरीक्षक भरत दाते करीत आहे.
दरम्यान, काही महिन्यांपूर्वी कोपरगावचे तत्कालीन तहसीलदार यांना वाळूतस्करांकडून पंटरमार्फत लाच स्वीकारत असल्याचे आरोप करत एसीबीने पकडले होते. त्यानंतर त्यांना निलंबित करण्यात आले आहे. अवैध वाळू उपसा रोखण्यासाठी सध्याचे तहसीलदार संदीप कुमार भोसले पावले टाकत असताना त्यांच्या पथकातील तलाठ्यांना अँटी करप्शनचा दम देऊन वाळू तस्कर आपले वर्चस्व निर्माण करू पाहताय का? असा प्रश्न सर्वसामान्य नागरिकांना पडला आहे? तलाठी आणि इतर शासकीय अधिकारीही भ्रष्टाचारात बरबटलेले नसेल तर त्यांनाही अशा धमक्यांना घाबरण्याची काय गरज? असाही प्रश्न उपस्थित होत आहे. मात्र वाळू तस्कराने धमकी देऊनही महसूल पथकाने चांगलाच हिसका दाखवल्याने वाळू तस्करांचे मात्र धाबे दणाणले असून महसूल पथकाच्या या कारवाईचे कौतुक होत आहे.
Read Latest Maharashtra News And Marathi News