नागपूर: कांद्याच्या दरांमध्ये सातत्याने वाढ दिसून येत आहे. गेल्या दहा दिवसांचा विचार करता कांद्याचा दर ठोक बाजरात प्रतिकिलो २० रुपयांनी वाढला असून रविवारी कांद्याचा दर ६० रुपये नोंदविण्यात आला. काही दिवसांपूर्वी टोमॅटोने सामान्यांचा जीव मेटाकुटीस आणला होता. जवळपास महिना-दीड महिना टोमॅटोचे दर प्रतिकिलो शंभरीपार गेले होते.
त्यानंतर आता कांद्याने भाव खाण्यास सुरुवात केली आहे. १९ ऑक्टोबरला ठोक बाजारात कांद्याचा दर प्रतिकिलो ४० रुपये होता. त्यानंतर सातत्याने दरवाढ होत आहे. रविवार, २९ ऑक्टोबरला दर ६० रुपयांवर पोहचला. याचाच अर्थ दहा दिवसांत वीस रुपयांची वाढ अनुभवण्यात आली. ठोक बाजाराप्रमाणेच किरकोळमध्येही दरवाढ झाली आहे. सध्या किरकोळ बाजारात कांद्याचा दर प्रतिकिलो ८० रुपये आहे.
त्यानंतर आता कांद्याने भाव खाण्यास सुरुवात केली आहे. १९ ऑक्टोबरला ठोक बाजारात कांद्याचा दर प्रतिकिलो ४० रुपये होता. त्यानंतर सातत्याने दरवाढ होत आहे. रविवार, २९ ऑक्टोबरला दर ६० रुपयांवर पोहचला. याचाच अर्थ दहा दिवसांत वीस रुपयांची वाढ अनुभवण्यात आली. ठोक बाजाराप्रमाणेच किरकोळमध्येही दरवाढ झाली आहे. सध्या किरकोळ बाजारात कांद्याचा दर प्रतिकिलो ८० रुपये आहे.
याबाबत अधिक सांगताना कांदा बटाटा विक्रेता असोसिएशनचे अध्यक्ष गौरव हरडे म्हणाले,‘पावसामुळे कांद्याचे पीक विलंबाने येत आहे. महाराष्ट्रात होणारी आवक काहीशी उशिरा आहे. त्याचा फटका दरवाढीच्या स्वरूपात बसत आहे. सध्या सोलापूर, बेळगाव, बेंगळुरू, हैदराबाद, हुबळी येथून कांद्याची आवक सुरू आहे. दररोज दहा गाड्या येताहेत. मात्र, ही आवक दरवर्षीच्या तुलनेत असमाधानकारक आहे.’
कांद्याचा वापर दररोजच्या जेवणात मोठ्या प्रमाणात होतो. भाजी बनविण्यासाठी कांद्याची पेस्ट वापरण्यात येते. जेवतानाही कच्चा कांदा सोबतीला लागतो. मिळालेल्या माहितीनुसार, अशीच आवक राहिल्यास सर्वात मोठा असलेल्या दिवाळीत कांदा सामान्यांना रडविणार आहे. सध्या लाल कांद्याची आवक सुरू आहे. पांढरा कांदा अजून आलेला नाही. लाल कांदा घरगुतीपेक्षाही हॉटेल आणि रेस्टॉरंटमध्ये मोठ्या प्रमाणात वापरण्यात येतो. नवरात्रौत्सव संपल्याने सध्या मांसाहारी जेवणावर अनेक जण ताव मारताहेत. त्यासाठी ढाबा, रेस्टॉरंट, हॉटेलमधील जेवणाला पसंती देण्यात येत आहे. अशात कांद्याचा वाढलेला दर रेस्टॉरंटवाल्यांची चिंता वाढवत आहे.