डेक्कन क्वीन सीएसएमटीमध्ये दाखत होताच रेल्वे प्रशासनाकडून संपूर्ण गाडीत स्वच्छता मोहीम राबवण्यात आली. सर्वप्रथम गाडीच्या छतावर असलेल्या उंदरांना पकडण्यात आले. त्यानंतर संपूर्ण गाडीची स्वच्छता करून जंतुनाशकांची फवारणी करण्यात आली. प्रवाशांना स्वच्छ आणि जंतुमुक्त वातावरणात प्रवास करता यावा, यासाठी आवश्यक सर्व उपाययोजना करण्यात येत आहेत, असे मध्य रेल्वेचे मुख्य जनसंपर्क अधिकारी डॉ. शिवराज मानसपुरे यांनी सांगितले.
डोक्यावर उंदीर अन् पायाखाली झुरळं; डेक्कन क्वीन एक्स्प्रेसची अजब सवारी, प्रवाशांचा संताप
डेक्कन क्वीनमध्ये पेस्ट कंट्रोल करण्याचे काम खासगी कंत्राटदाराला देण्यात आले आहे. कंत्राटदारांकडून रेल्वेगाडीत नियमित औषध फवारणी करण्यात येते. उंदरांना पकडण्यासाठी प्रत्येक डब्यात आठ रॅटपॅड लावण्यात आले आहेत. मात्र येथे उंदरांचा वावर असल्याने कर्तव्यात हलगर्जी केल्याचा ठपका ठेवत कंत्राटदाराला दहा हजारांचा दंड ठोठावण्यात आला. वाडीबंदर यार्ड परिसरात डेक्कन क्वीन एक्स्प्रेस देखभालीसाठी उभी करण्यात येते. यार्डमधील उंदरांचा बंदोबस्त करण्यासाठी रेल्वे कर्मचाऱ्यांनाही सूचना देण्यात आल्या आहेत, असे अन्य रेल्वे अधिकाऱ्यांनी स्पष्ट केले.