पहिली कारवाई

मुंबई परिसरात तीन मोठ्या कारवाया एनसीबीने क्षेत्रीय संचालक अमित घावटे यांच्या नेतृत्वात केल्या. पहिल्या कारवाईत खारघर येथे पॉल आयकेना या ६०वर्षीय नायजेरियन दलालाला अटक करण्यात आली आहे. गुप्त माहितीच्याआधारे छापा टाकला असता १.९५९ किलो कोकेनचा साठा सापडला. अधिक माहिती घेतली असता हा साठा सुरत येथील साकिर व सुफियान यांना दिला जाणार असल्याची माहिती मिळाली. त्या दोघांनाही अटक करण्यात आली. त्याचवेळी पॉल आयकेना हा मिरा रोड येथे भाड्याच्या घरात राहत होता. त्या खोलीच्या मालकाचाही या तस्करीत सहभाग असल्याने त्याला अटक करण्यात आली. तसेच अंमली पदार्थ तस्करीचा पैसा मनी लाँड्रिग पद्धतीने व्यवहारात आणण्यासाठी एका बँकेतील व्यवस्थापकाचा सहभाग होता. त्या मोठ्या व्यावसायिक बँकेच्या अधिकाऱ्यालाही अटक करण्यात आली आहे. पॉलला या प्रकरणात याआधीही १९८९, २००१ व जानेवारी २०२३मध्ये अटक झाली होती.

दुसरी कारवाई

दुसऱ्या प्रकरणात बोलिव्हियाच्या साओ पावलो येथून दुबईमार्गे एतिहाद एअरलाइन्सने आलेल्या एवलिना अल्वारेझ व ग्लोरिया इओर्का या दोघींना अटक करण्यात आली. या दोघीही खेतवाडी येथील हॉटेलमधून हा व्यवसाय करणार असल्याची गुप्त माहिती होती. त्याआधारे एनसीबीने छापा टाकला असता त्यांच्याकडून एकूण ५ किलो कोकेन जप्त करण्यात आले.
सुसंस्कृत पुणे तस्करीचे केंद्र; दहा महिन्यांत १४ कोटींचे अमली पदार्थ जप्त, राजकीय वरदहस्त कोणाचा?
तिसरी कारवाई

तिसऱ्या कारवाईत पुणे जिल्ह्यातील शिरूरजवळ गुप्त माहितीच्याआधारे छापा टाकला असता तेथील दोन प्रयोगशाळेत अल्प्राझोलम हे अंमली पदार्थ तयार केले जात असल्याचे दिसून आले. त्याचा १९९.३० किलोचा साठा जप्त करण्यात आले. हे अंमली पदार्थ महाराष्ट्रासह तेलंगण व आंध्र प्रदेशात ताडीमध्ये मिसळून सेवनासाठी पाठवले जाणार होते. या प्रकरणात दोघांना अटक करण्यात आल्याची माहिती एनसीबीने दिली.